Радий Хәбиров Яңы йылға шау-шыулы байрамдар үткәреүҙе тыйҙы

«Мин барығыҙҙы ла һорайым, алдағы ваҡытта концерт һәм күңел асыу саралары тураһында онотоғоҙ, быны үҙем тикшерәсәкмен. Алда Яңы йыл ҡаршылау тора, беҙ уны мотлаҡ үткәрәсәкбеҙ, ғаиләләр хәстәрлек, балалар байрам һәм бәхет тойорға тейеш», - тине Радий Хәбиров.

Ул шулай уҡ район-ҡала башлыҡтарына Яңы йыл иллюминацияһын яңыртыуҙы тыйҙы.

«Бер ниндәй ҙә яңы шыршы алмаясаҡһығыҙ, улар һеҙҙә бар. Шыршыһыҙ ҙа Яңы йылды яҡшы кәйефтә үткәрәсәкбеҙ. Тағын да ҡабатлайым, бер ниндәй ҙә артист кәрәкмәй – теләйһегеҙ икән гармун алығыҙ ҙа үҙегеҙ йырлағыҙ», - тине республика етәксеһе.

Радий Хәбиров белдереүенсә, бынан ары барлыҡ аҡса иҡтисадты үҫтереүгә, социаль сфераға, мобилизацияланғандарға һәм уларҙың ғаиләләренә ярҙамға йүнәлтелергә тейеш.
Төбәк етәксеһе үҙенең хакимиәт башлығы Максим Забелинға мобилизация үткән ир-егеттәрҙең балаларына айырыуса иғтибар бирелергә тейеш тине.

«Яңы йыл ул иң беренсе балалар байрамы булып тора. Барыбыҙ ҙа ҡосаҡлашайыҡ, Яңы йылды үткәрәйек, ә ҡалғаны – яҡшы ваҡыт еткәнсе көтөп торор», - тип белдерҙе Радий Хәбиров.

https://www.bashinform.ru/news/social/2022-10-17/radiy-habirov-zapretil-na-novyy-god-provodit-shumnye-prazdniki-i-gulyaniya-2991845

Автор:Азат Ғиззәтуллин.

https://bash.bashinform.ru/news/social/2022-10-17/radiy-h-birov-ya-y-yyl-a-shau-shyuly-bayramdar-tk-re-e-tyy-y-2991873