Башҡорт әҙәбиәтенең пәйғәмбәренә арналды

Башҡорт әҙәбиәтенең пәйғәмбәренә арналды

Үтәгән ауылында көн һайын тиерлек төрлө-төрлө үҙенсәлекле саралар уҙа. Уларҙың барыһы ла “Айыҡ ауыл” республика конкурсы сиктәрендә башҡарыла.

Башҡортостандың халыҡ яҙыусыһы, әҙәбиәт белгесе, БР Фәндәр академияһы ака­демигы, филология фәндәре докторы, профессор, С. Юлаев исемендәге дәүләт премияһы лауреаты Ғайса Хөсәйеновҡа арналған хәтер кисәһе шәхсән үҙем өсөн иң әһәмиәтле са­раларҙың береһе булды. Сөн­ки миңә ҡасандыр “Башҡорт энциклопедияһы”н әҙерләү өҫтөндә Ғайса Батыргәрәй улы менән бергә эшләү бәхете тейҙе. Бөтә ҡатмарлы һорауҙар менән тик уға мөрәжәғәт итә инек.

Хәтер кисәһе арҙаҡлы шәхестең ҡәберенә һәм ауыл мәктәбе янындағы Бөйөк Ватан һуғышында ҡатна­шыусыларға арналған һәй­кәлгә сәскәләр һалыу менән башланды.

Сара барышында Өфөнән килгән ҡунаҡтар - яҙыусы, журналист Фәнил Ҡоҙаҡаев, энциклопедия белгесе, БР-ҙың Әхмәтзәки Вәлиди исемендәге исемендәге милли китапхана­ның ғилми секретары Клара Әһлиуллина, тарих фәндәре кандидаты Нурислам Ҡал­мантаев, филология фәндәре кандидаты Рәүеф Иҙрисов, районыбыҙ әҙиптәре - Фәрғәт Ҡотлобаев, Риф Йөҙлөкбаев, башҡорт теле уҡытыусылары арҙаҡлы яҡташыбыҙҙы тик изге һүҙҙәр менән генә иҫкә алды, яҡты хәтирәләре менән бүлеште. Иң тәүге һүҙ район хакимиәтенең мәғлүмәт-ана­литик бүлеге начальнигы Ру­шания Хәмәтғәлимоваға би­релде.

- Үтәгән ауылы халҡы менән һоҡланам. Ҡыҫҡа ғына ваҡыт эсендә “Айыҡ ауыл” республика конкурсы сик­тәрендә һеҙ бик күп эштәр башҡарҙығыҙ. Ҡырмыҫҡалы ере ғорурланырлыҡ арҙаҡлы шәхестәргә бай булыуын бө­гөнгө сара тағы бер тапҡыр иҫ­батлай, - тине ул.

Яңы Ҡыйышҡы ауыл со­веты хакимиәте башлығы Фәнзиә Өмәтҡолова ла ошо бәләкәй генә ауылдың шун­дай бөйөк шәхестәр үҫтереүе, бында уңған, тырыш, талантлы халыҡ йәшәүе хаҡында һөйлә­не һәм республика кимәлен­дә “Айыҡ ауыл” конкурсында еңеү яуларға өмөтөн белдерҙе.

Ғайса Батыргәрәй улының “Ватандаш” журналының баш мөхәррире булараҡ журнали­стика өлкәһендә лә яҡты эҙ ҡалдырыуы тураһында Фәнил Шәмсетдин улы бәйән итте һәм ул мәктәп уҡыусыларына ярты йылға “Аманат” журна­лына, “Йәншишмә” гәзит­тәренә яҙылыу бүләк итте.

- Ғайса Хөсәйеновтың башҡорт теле һәм әҙәбиәте үҫешенә, башҡорт энциклопе­дияһы эшенә индергән өлөшө баһалап бөткөһөҙ. Китап сыға­рыу эше еңел түгел, шулай ҙа Ҡырмыҫҡалы районы энци­клопедияһын да булдырырға яҙһын, - тигән һүҙҙәрен ет­керҙе Клара Ишбулды ҡыҙы. Ул да мәктәпкә китаптар һәм үҙе ҡатнашлығында эшләнгән үҫеш уйыны бүләк итте.

Рәүеф Рифҡәт улы ла үҙе­нең уҡытыусыһы, диссерта­ция етәксеһе хаҡында йылы һүҙҙәрен әйтте:

- Интеллигент булды ул, икенсе төрлө әйткәндә зы­ялы, нурлы һәм илһөйәр кеше. Ғайса – ул пәйғәмбәр исеме. Бында килер алдынан Мар­сель Сәлим осраны һәм: “Ғай­са Хөсәйенов – ул башҡорт әҙәбиәтенең пәйғәмбәре. Ошо сәләмемде еткерегеҙ, зинһар, үтәгәндәргә”, - тине.

Нурислам Мирхәйҙәр улы­ның ялҡынлы телмәрендә Ғайса Хөсәйенов эшмәкәрле­генә тәрән ихтирам, оло хөр­мәт, ауылда йәшәгән халыҡҡа дан, тел яҙмышына борсолоу, илһөйәрлек тойғолары менән тулы һүҙҙәр яңғыраны:

- Иң тырыш халыҡ Ҡырмыҫҡалыла йәшәй. Бында ты­уған билдәле шәхестәр быға асыҡ миҫал булып тора. Тарих, тел һәм әҙәбиәт институтын­да эшләгән бөтә кешеләрҙең эшен Ғайса Батыргәрәй улы бер үҙе тиерлек башҡарҙы. Ғайса Хөсәйенов – ул беҙҙең мәғрифәтсе. Уның ошондай исеме булырға тейеш. Район­да ғына түгел, Өфө урамдары, Тарих, тел һәм әҙәбиәт инсти­туты уның исемен йөрөтөргә, Өфөлә таҡтаташы булырға тейеш. Ә Үтәгән мәктәбенә уның исемен биреү мотлаҡ.

Башҡа сығыш яһаусылар ҙа яҡташыбыҙҙың ябай, бөйөк, итәғәтле, ғилемле булыуы, ҙур мираҫ ҡалдырыуы һәм уның исемен мәңгеләштереү эшен дауам итергә кәрәклеге хаҡын­да һөйләне.

Сара һуңында Фәнил Ҡоҙаҡаев Ғ.Хөсәйенов ту­раһында ғилми эш башҡарыу­сы башланғыс кластар уҡытыу­сыһы Ильвина Әхмәтйәноваға һәм үҙҙәренең сағыу сығышта­ры менән кисәне йәмләүсе бер төркөм уҡыусыларға Рәхмәт хаты тапшырҙы.

Ошондай фәһемле сара­лар артабан да булып торһон, ә үтәгәндәр алдына ҡуйған маҡсаттарына ирешһен, тигән теләктә ҡалабыҙ.

Розалия НАЗАРОВА.

Автор фотолары.