Йылытыу миҙгеленә әҙерлек башланды

Йәйге осорҙа “Теплосеть” йәмғиәте хеҙмәткәрҙәре 2026-2027 йылдарҙың киләһе ҡышында йылылыҡ һәм уңайлылыҡ булдырыу өсөн йылылыҡ менән тәьмин итеү системаларына “инвентаризация” үткәрә. Эштәр селтәрҙәрҙе капиталь ремонтлауҙан алып, яңы саҡырыуҙар шарттарында объекттарҙың хәүефһеҙлеген көсәйтеүгә тиклем бер үк ваҡытта бер нисә урында алып барыла.
Һандар һәм факттар
Уҙған йылытыу осоро тамамланғандан һуң беренсе этапта гидравлик һынауҙар бул­ған. Дөйөм оҙонлоғо 12 саҡ­рым­дан ашыу булған тышҡы йылылыҡ селтәрҙәре ныҡлығы һәм тығыҙлығы тикшерелде. Өҙөклөктәр йәки “көсһөҙ” урын­дар күрһәткән участкалар тиҙ арала ремонт графигына индерелгән. Параллель рәүештә барлыҡ йылылыҡ камералары буйынса бикләү арматураһына ревизия үткәрелгән, шулай уҡ ҡоролмалар таҙартылған – был ҡыш көнө аварияһыҙ эшләү өсөн мотлаҡ шарт.
Предприятие ҡарамағындағы туғыҙ ҡаҙанлыҡта технологик һәм ҡаҙанлыҡ ҡорамалдарын ағымдағы ремонтлау тамамланған. Социаль өлкә объекттары айырым контролдә тотола. Иҫегеҙгә төшөрәбеҙ, ошо туғыҙ йылылыҡ сығанағының бишәүһе Ҡырмыҫҡалы, Ҡабаҡ, Иҫке Ҡыйышҡы һәм Константиновка ауылдарында торлаҡ фондын йылыта. Ике ҡаҙанлыҡ Прибельский участка һәм район үҙәк дауаханаларында һаулыҡ һаҡлау учреждениеларының эшмәкәрлеген тәьмин итә. Тағы береһе хәрби комиссариат бинаһын хеҙмәтләндерә.
Адреслы ҡарарҙар: алмаштырыу һәм модернизациялау
Быйыл ремонт кампанияһы теүәл һәм юғары технологиялы үткәрелгән. Константиновка ауылында йылылыҡ юғалтыуҙы кәметеүсе заманса полиуретан (ППУ) изоляцияһына торбалар һалып, 77 метр квартал-­ара йылылыҡ селтәре алыштырылған. Урындағы ҡаҙанлыҡта ике “Техногаз-100” ҡаҙанының эске өҫтө шламдан һәм коррозия эҙҙәренән таҙартылған, шу­лай уҡ селтәр насостарын туйындырыусы көс кабелдәре яңыртылған.
Район үҙәк дауаханаһында махсус ойошма эшкә ҡушылды. Ҡаҙандар тәрән таҙартыу үткән: төтөн торбалары ҡоромло ҡатламдарҙан таҙартылған, ә торба аралары махсус иретмә менән йыуылған. Бынан тыш, ҡаҙандарҙың ҡапҡастары ремонтланған, уларҙы һаҡлаусы состав менән ҡаплағандар – был юғары температурала металдың яныуын булдырмай.
Иҫке Ҡыйышҡы ауылының Окраинная урамындағы 1-се һәм 2-се йорттарҙа йәшәүселәр өсөн күптәнге һыу мәсьәләһе хәл ителгән. Белгестәр ике циркуляция насосын ҡеүәтлерәк агрегаттарға алмаштырғандар, был иһә өҫкө ҡаттарҙы һыу менән өҙлөкһөҙ тәьмин итеүҙе гарантиялай.
Яңы объект
Предприятиеның яуаплы­лыҡ зонаһын киңәйтеү мөһим ва­ҡиғаларҙы береһе. Ростехнад­зор күрһәтмәһе буйынса Ҡарлыман ауыл Советы хакимиәте Олокүл ауылының ҡаҙанлыҡ һәм йылылыҡ селтәрҙәрен хә­үефле производство объекттары менән эшләү өсөн кәрәкле лицензияһы булған “Теплосеть” йәмғиәтенә файҙаланыуға тапшырған. Яңы команда оператив рәүештә селтәрҙәр буйынса арматураға ревизия үткәргән, дүрт япма алмаштырылған, бетон лотоктар тәртипкә килтерелгән һәм үткәргес торбаларҙағы изоляция яңыртылған.
Киләһе йылытыу осоронан (2026-2027) йылытыу бу­йынса коммуналь хеҙмәттәрҙе “Теплосеть” йәмғиәте башҡарасаҡ. Олокүл ауылының торлаҡ биналары хужаларына һәм ҡуртымға алыусыларға хеҙмәт күрһәтеүгә килешеү төҙөргә кәрәк. Абонентлыҡ бүлеге Ҡыр­мыҫҡалы ауылы, Туҡаев урамы, 5А адресы буйынса һеҙҙе көтә. Үҙегеҙ менән тораҡҡа хоҡуҡты билдәләүсе документтар булыр­ға тейеш. Шулай уҡ иҫегеҙгә тө­шөрәбеҙ: йылылыҡ менән тәьмин итеүсе ойошманың яуап­лылыҡ сиге йорттоң тышҡы стенаһы янында тамамлана. Эске ҡайырғыс өсөн 354-се һан­лы Коммуналь хеҙмәттәр күрһәтеү ҡағиҙәләре нигеҙендә Идаралыҡ компанияһы һәм фатир милекселәре яуап бирә.
Хәүефһеҙлек һаҡ аҫтында
Пилотһыҙ осоу аппаратта­рының инфраструктураға һө­жүм­дәре йышайған шарттарҙа Ҡырмыҫҡалы һәм Олокүл ауыл­дарындағы ике ҡаҙанлыҡ йылылыҡ менән тәьмин итеү­ҙең иң мөһим объекттары тип та­нылды. Үҙәк ҡаҙанлыҡта ҡа­ҙанлыҡ һәм насос залдарының тәҙрә уйымдарына антидрон селтәрҙәр урынлаштырылған, ә шкафлы газ көйләгес яйлан­малар ҡом тултырылған тоҡтар менән һаҡлана. Олокүл ауылында был эштәрҙе яҡын арала башҡарасаҡтар.
Эш башҡарыусыларға рәхмәт
Отчеттарҙың ҡоро һандары артында кешеләрҙең ауыр хеҙ­мәте ята. Ҡышҡа әҙерлектең иң ҡыҙған ваҡытында һәр узел өсөн яуаплы оҫталарҙы билдәләп үтке килә. Бына улар - Ҡабаҡ ҡаҙанлығынан Рәис Хәсәнов, Прибельский ҡаҙанлығынан Сер­гей Прибимов һәм үҙәк ҡаҙанлыҡтан – Ильяс Әминов. Иретеп йәбештереүселәр Айрат Вәлийәнов һәм Радик Шәңгәрәйев юғары һөнәри оҫталыҡ күрһәтәләр.
Слесарҙар һәм операторҙар Айрат Баймөхәмәтов, Василий Кузьмин, Вадим Сиражетдинов, Радик Әминев һәм предприятиеның тиҫтәләгән башҡа хеҙмәткәрҙәре көндәлек режимда ритмик эш менән тәьмин итәләр. Тап уларҙың ҡулдары менән беҙ тәүге һыуыҡтарҙы тойоуға ышаныслылыҡ барлыҡҡа килә.
Ваҡытында түләйек!
Бөгөнгө көндә халыҡтың йылылыҡ коммуналь хеҙмәте өсөн “Теплосеть” йәмғиәте алдында 14 миллион 400 мең һум бурысы бар. Уйлап ҡарағыҙ әле, был бурыс ҡына түгел, ә райондың коммуналь инфраструктураһын үҫтереүгә етди ярҙам була алырлыҡ аҡса.
Был аҡсаға тағы бер километрҙан артыҡ туҙған торбаларҙы алмаштырырға, өҫтәмә насостар урынлаштырырға, йылылыҡ камераларын ремонтларға, яҡын-тирә биләмәләрҙе һәм йылылыҡ пункттарын тәртипкә килтерергә мөмкин. Ғөмүмән, беҙҙең һәр беребеҙҙең уңайлылығына эшләй торған аҡса. Ҡыҙғанысҡа ҡаршы, әлегә улар бурыс булып ҡала.
Бурыслылар менән даими рәүештә суд-дәғүә эше алып барыла. Әммә бурысты ваҡытында түләү мәжбүри түләтеүҙән дә отошлораҡ икәнен халыҡ иҫендә тотһон ине. Ирекле түләгәндә ҡулланыусы бурыстың суммаһын ғына түләй. Ә бына эш судҡа тиклем барып етһә, уға дәүләт пошлинаһы (2 мең һумдан суд приказы биргән өсөн генә) һәм суд сығымдары өҫтәлә.
Әйҙәгеҙ был хәлде бергәләп үҙгәртәйек! Коммуналь хеҙмәттәр өсөн ваҡытында түләгеҙ һәм был аҡса йылылыҡ менән тәьмин итеү системаларын яҡшыртыуға йүнәлтеләсәк.
Светлана КАРПОВА.