Бергәләп донъяны таҙартайыҡ!

Район үҙәге майҙаны өмәселәргә айырыуса байрам кәйефе өләште. Бында яңғыраған күңелле музыка район буйлап таралып, ҡатнашыусыларҙы һөҙөмтәле эшкә рухландырҙы һәм күмәкләп эшләүҙең файҙалы ғына түгел, шатлыҡлы ла була алыуын иҫкә төшөрә. Һәр кем үҙенә беркетелгән биләмәләге тротуарҙарҙы, газондарҙы тәртипкә килтерҙе, скверҙарҙы һәм парктарҙы ҡарҙан таҙартты.
Беренсе өмә бергәләп эш иткәндә, һөҙөмтә көтөлгәндән юғарыраҡ булыуын күрһәтте. Был беҙҙең районды үҙгәртеү буйынса ҙур юлдың башы ғына. Алда - яңы өмәләр, йәшелләндереү буйынса акциялар, биләмәләрҙе йыйыштырыу буйынса башҡа башланғыстар. Таҙалыҡ һәм тәртип тормошобоҙҙоң ҡануны, ә бәләкәй Ватанға һөйөү беҙҙең барыбыҙҙы ла берләштереүсе булһын!

Алһыу Насирова, үҙәкләштерелгән китапханалар системаһы методисы: - Бөтә коллектив менән килдек һәм үкенмәнек! Саф һауала эшләү, музыка, коллегаларҙың йылмайыулы йөҙҙәре яҙғы көндә тағы нимә яҡшыраҡ була ала? Бындай саралар беҙгә "бер ҙур ғаилә" булыуыбыҙҙы иҫебеҙгә төшөрә һәм тирә-яғыбыҙҙың ниндәй буласағы һәр ҡайһыбыҙҙан тора.

Регина Шәйхлисламова, колледж студенты: Мин тәүге тапҡыр өмәлә ҡатнаштым. Тәүҙә күңелһеҙ булыр тип уйлағайным, әммә бик ҡыҙыҡлы булып сыҡты! Күршеләр менән таныштым, колледж биләмәһен тәртипкә килтерергә ярҙам иттем. Хәҙер өлкәндәрҙең бала саҡтағы өмәләрҙе ни өсөн йыш иҫкә алыуын аңлайым.
Гөлсәсәк Аласова.