Шаян һәм отҡорҙарҙа ҡунаҡта

Һәүәләйҙә шаяндар һәм зирәктәр байрамы үтте.
Йома кисенән яҡшыраҡ нимә булырға мөмкин? Бары тик ысын күңелдән көлөү, дуҫтарса атмосфера һәм иҫ киткес юмор менән тулған йома кисе генә. Нәҡ бына шундай байрамды Һәүәләй ауылы мәҙәниәт йортонда уҙған “Беҙ йәшеллек өсөн” тип исемләнгән шаяндар һәм зирәктәр клубының экологик фестивале бүләк итте. Сара “ЭкоПоколение” экомарафоны сиктәрендә Халыҡ-ара КВН көнөнә арналды.
Сәләмләү һүҙе менән Һәүәләй ауыл биләмәһе хакимиәтенең эштәргә идара итеүсеһе Ильвина Хәмитова сығыш яһаны.
- Хөрмәтле дуҫтар, беҙҙең биләмәлә йәшәүселәр! Был иҫ киткес байрамды – КВН-ды үҙебеҙҙә ҡабул итеү беҙҙең өсөн ҙур мәртәбә. Бөгөн беҙ бында тамашасылар һәм ҡатнашыусылар булараҡ ҡына түгел, ә бер ҙур һәм татыу ғаилә булараҡ йыйылдыҡ. КВН – таланттарҙы асыу, беҙҙең ниндәй күңелле, креатив һәм битараф булмағанлыҡты күрһәтеү өсөн бына тигән мөмкинлек ул. Барлыҡ командаларға ла тапҡырлыҡ, позитив һәм беҙгә бик күп шатлыҡлы миҙгелдәр бүләк итеүҙәрен теләйем. Әйҙәгеҙ, бергәләп юмор кисәһе яһайыҡ, - тине Ильвина Илшат ҡыҙы.
Иң зирәк һәм тапҡыр исеменә дүрт команда көрәште: “Ква-ква” (Николаевка ауыл Советы), “Планета хужалары” (Һәүәләй ауыл Советы), “Эко-бригада” (Прибельский ауыл Советы) һәм “Тоҡтағы беҙ” (Сахай ауыл Советы).
Уларға “Визитка” конкурсында үҙ командаһын асыҡ һәм оригиналь рәүештә тәҡдим итергә, тамашасыларҙан һәм жюриҙан (“Импровизация”) ҡыҙыҡлы һорауҙарға үткер яуаптар эҙләргә һәм танылған фильмдар һәм мультфильмдар геройҙарын (“Озвучка”) яңғыратырға кәрәк ине.
Барлыҡ сығыштар ҙа берҙәм тема - тәбиғәткә һөйөү тәрбиәләү, планетаның таҙалығы тураһында ҡайғыртыу һәм сәләмәт йәшәү рәүешен пропагандалау менән һуғарылғайны. Жюри алдында ҡатмарлы бурыс торҙо: һәр сығышты өс баллы система буйынса баһаларға һәм иң яҡшыларын билдәләргә кәрәк ине.
Залда дәртле, шаян көлөүҙәр һәм көйәрмәндәрҙең көслө алҡыштары кисәне тағы ла йәнләндереп торҙо. Сағыу, шаян һәм ысынында көлкөлө номерҙар бер кемде лә битараф ҡалдырманы.
Район хакимиәтенең йәштәр сәйәсәте, физик культура һәм спорт бүлеге етәксеһе Руслан Хәйертдинов барлыҡ ҡатнашыусыларға йылы атмосфера тыу­ҙырғандары һәм байрам кәйефе бүләк иткәндәре өсөн рәхмәт белдерҙе, йәш быуынға ижади уңыштар теләне һәм еңеүсе командаларға Дипломдар һәм иҫтәлекле бүләктәр тапшырҙы.
Һөҙөмтәлә уйын йомғаҡтары буйынса призерҙар билдәләнде: “Эко-бригада” командаһы еңеүсе тип табылды һәм беренсе урынға лайыҡ булды. Икенсе урынды - «Ква-ква» һәм «Тоҡтағы беҙ» командалары бүлеште, “Планета хужалары” командаһы өсөнсө урынды яуланы.
Фестиваль бик күңелле үтте, ыңғай хис-кисерештәр һәм яҡшы кәйеф бүләк итте. Беҙ барлыҡ командаларға ла ирешелгәндәрҙә туҡталып ҡалмаҫҡа, ижад итергә, шаярырға һәм алға яңы юмористик ҡаҙаныштарға хәрәкәт итергә теләйбеҙ.
Гөлсәсәк ӘСӘҘУЛЛИНА.