"Йәшәһен башҡорт аты"

Бер йыл элек Темәс ауылында йәшәүсе фермер Илнур Биктимеров исемле ир-егет башҡорт атына бағышланған матур йырға конкурс иғлан иткәйне. Был башланғысты бөтә халыҡ дәррәү күтәреп алды. Ике йөҙләп йыр яҙылды. Рәсәйҙең төрлө төбәктәренән булған ҡатнашыусылар араһында олоһо ла, кесеһе лә, танылған һәм бөтөнләй билдәле булмаған авторҙар бар ине.

6 сентябрь көнө Баймаҡ районы Граф күле янында үткән "Башҡорт аты" фестивалендә ошо конкурста еңеп сыҡҡан "Йәшәһен башҡорт аты" йыры яңғыраны, ошо гимн яңғырауы аҫтында аттар парады үтте. Гимндың авторҙары - үҙебеҙҙең талантлы яҡташтарыбыҙ, шағирә Фирүзә Абдуллина һәм музыка белгесе, композитор һәм йырсы, Башҡортостандын атҡаҙанған мәҙәниәт хеҙмәткәре Рәмил Туйсин. Гимнды әҙерләп сәхнәгә сығарыусы ла ул. "Атайсал" төркөмө егеттәренә афарин тип әйтергә генә ҡала.

Яҡташтарыбыҙҙы оло еңеү менән ихлас күңелдән ҡайнар ҡотлайбыҙ, артабан да уңыштар теләйбеҙ! Афарин!

"БАЙМАҠ" яҡташтар ойошмаһы

Сығанаҡ: Тамаша журналы