Бер мәл генә ул

Быйыл Динис Ҡоҙаҡаевҡа ла Башҡорт дәүләт аграр университеты студенты булыу бәхете тейҙе. Ул Малай мәктәбенең 6-сы класын тамамлағандан һуң уҡыуын Стәрлетамаҡ 2-се һанлы лицей-интернатында дауам итә. Ауыл мәктәбенән һуң интернаттағы шау-гөр килеп торған тормошҡа тиҙ өйрәнеп китә Динис. Әүҙем булғаны өсөн лицейҙың президенты итеп һайлана, Стәрлетамаҡ балалар Ҡоролтайы рәйесе лә була. Өлкән кластарҙа мәктәптә уҡыу йылдары бик тә ҡыҙыҡлы үтте, тип хәтерләй ул.
Тырыш егет лицей-интернатты көмөш миҙалға тамамлай. Берҙәм дәүләт имтихандарын информатика, профиль математика, рус теленән тапшыра. Әлеге көндә БДАУ-да Механика һәм һанлы инжиниринг факультетының 1-се курсында "Агроинженерия" йүнәлешендә уҡып йөрөй.
Денис өс балалы ғаиләлә үҫкән. Ағайҙары шул уҡ лицей-интернатты тамамлағандар. Өлкәндәре Салауат Башҡорт дәүләт университетын, уртансылары Байрас Стәрлетамаҡ төҙөлөш колледжын тамамлап, эшләп йөрөйҙәр.
- Атай-әсәйемә, ағайҙарыма имтихандарға әҙерләнгәндән башлап, тапшырғанға тиклем һәм университетҡа инергә ярҙам итеп дәртләндереп торғандары өсөн ҙур рәхмәт. Уларҙың өмөттәрен аҡлап, яҡшы уҡырға тырышасаҡмын.
Төркөмдә староста ярҙамсыһы итеп һайландым. Уҡыуҙан һуң студенттар һәм аспиранттар профкомында эшләйем.
Ысынлап та, студент булыуы бик күңелле икән. Йәшлектең иң матур, ҡыҙыҡ миҙгеле тип уйлайым, - тип уртаҡлашты Динис.
Эйе, студент йылдары – бер генә мәл, һиҙмәй ҙә ҡалаһың үткәнен. Студент осороғоҙҙоң ҡәҙерен белегеҙ, тип әйтке килә бөгөн төрлө уҡыу йорттарында белем алыусы йәштәргә. Ҡулығыҙға дипломдар алып, ҡыуанырға яҙһын. Тыуған яғығыҙ һеҙҙе көтә!
Гөлсәсәк Аласова.