Ир-егеттәр китә ил һаҡларға

Еңеүҙе яҡынайтыу өсөн ир-егеттәрҙең иңдәренә күп көс һалына. Һүҙ махсус хәрби операцияла ҡатнашыусы “Борисыч” ҡушаматлы яугир тураһында бара. Башҡа яҡташтарыбыҙ кеүек үк, һуғышты туҡтатыу өсөн хәленән килгәнсә үҙ өлөшөн индерә. Әйт­кәндәй, ҡыҫҡа ваҡытлы ялдан һуң ошо көндәрҙә тағы ла иптәштәре янына юлланды.
“Борисыч” ҡушамат­лы яҡташыбыҙ Иҫке Бә­пес ауылында ишле ғаи­ләлә тыуған. Бала сағы һәм үҫмер йылдары тыныс тормошта ҡыҙыҡлы һәм күңелле үтә. Урындағы мәктәптә белем ала. Мәктәп һәм ауыл тормошонда ҡайнап йәшәй. Төрлө сараларҙа ҡатнаша, спорт менән дә дуҫ була. 18 йәше тулғас, һәр ир-егет алдында торған изге бурысты үтәү өсөн армияға алына. Псков ҡалаһындағы 76-сы гвардия һауа-десант дивизияһында хеҙмәт итә. Армияла ике йыл хеҙмәт иткәндән һуң, Рәсәй Оборона министрлығы менән контракт төҙөп, тағы ла шул дивизияла хеҙмәт итергә ҡала. Хеҙмәт осоронда Чечен Республикаһында контртеррорис­тик операцияла ҡатнаша. Һигеҙ ай Чечняла булғас, кире дивизияға ҡайта.
Хеҙмәтен тултырып тыуған төйәгенә ҡайтҡас төрлө эштәрҙә эшләй: тө­ҙөлөш тармағында ла булыша, Себер тарафтарында ла эшләп ҡайта. Унан һуң Өфө ҡалаһында тәртип һағында хеҙмәт итә. 2016-2019 йылдарҙа контракт буйынса Абхазия Республикаһына тактик төркөм батальонында бүлек командиры вазифаһында хеҙмәт итә. Унан ҡайтҡас, Салауат ҡалаһында холоҡ төҙәтеү колонияһының хәүефһеҙлек бүлегендә эшләй. 2022 йылдан ағымдағы йылдың апрель айына тик­лем Ҡыр­мыҫҡалы енә­­­йәт-баш­ҡарыу инс­пекцияһы инспекторы бу­ла. Ағымдағы йылдың апрелендә Рәсәй Оборона министрлығы менән контракт төҙөп махсус хәрби операция зонаһына юллана.
- Махсус хәрби операция башланғас та унда барыу теләгем бар ине, сөнки минең хәрби тәжрибәм дә бар. Шуға мин унда кәрәгерәкмен,- ти яугир.
“Борисыч” 428-се полкта лейтенант дәрәжәһендә тәүҙә бүлек командиры булып хеҙмәт итә, һуңынан взвод командиры итеп ҡуялар үҙен. Май айында яңы 1435-се штурмлаусы полк булдырылғас, “Борисыч”ты психолог итеп күсерәләр. Үҙ эшен белеп, яратып башҡарған хеҙмәткәрҙе октябрь айынан өлкән лейтенант дәрәжәһендә полктың психологик хеҙмәте начальнигы итеп тәғәйенләйҙәр.
- Махсус хәрби операцияға тәүге килгәндәр һәм яуҙан сыҡҡандар менән психологик эш алып барабыҙ, төрлө яҡлап ярҙам итергә тырышабыҙ, - ти өлкән лейтенант.
Ул күптән түгел ғаиләһе янында ҡыҫҡа ваҡытлы ялда булып китте. Ялын күберәге ҡатыны, балалары һәм яҡындары менән үткәрә.
- Ҡыҫҡа ял ваҡытында Иҫке Бәпес ауыл Советы ауыл биләмәһе башлығы Азамат Ғәйфуллин менән осрашып күрештек. Етәкселеккә, ауыл халҡына оло рәхмәтемде еткерәм. Ауылдаштарҙан, ра­йон хал­ҡынан гуманитар ярҙам алып торабыҙ. Тыу­ған яҡтан хәбәр алыу айырыуса ҡыуаныслы. Бынан тыш, Ҡырмыҫҡалы линия-производство идаралығына оло рәхмәтемде еткерәм. Ҡырмыҫҡалы ли­ния-производство идаралығы хеҙмәткәре Әхтәм Хәсәнов иптәштәре Илшат Латипов һәм Сыңғыҙ Ҡорбанғәлиев менән УАЗ автомобиле, мотоцикл һәм муниципалитетта йә­шәүселәр тарафынан йы­йылған посылкалар алып килделәр. Улар араһында кәрәк-яраҡ әйберҙәрҙән, ризыҡтарҙан тыш, уҡыусыларҙың хаттары һәм һүрәттәре лә бар ине. Уҡыу­сыларҙың хаттары беҙ­­гә бик кәрәк, көс бирә, тыуған яҡтан сәләм булып күңелде йылыта,- ти яугир.
“Борисыч”ҡа һәм барлыҡ хәрби хеҙмәткәрҙәргә ныҡлы сәләмәтлек, түҙемлек теләп, еңеү менән тыу­ған яҡтарына әйләнеп ҡай­тыуҙарын теләп ҡалабыҙ.
Республика халҡы мах­сус хәрби операция зонаһында хеҙмәт итеү өсөн РФ Оборона министрлығы менән контракт төҙөһә, бер тапҡыр 505 мең һум аҡса аласаҡ. РФ Оборона министрлығы түләүҙәре (400 мең һум) һәм райондан (100 мең һум) контракт төҙөгәндә түләүҙәр 1 миллион һумға артты.
Контракт хеҙмәтенә бәйле һорауҙар буйынса 2-14-78, 2-11-58 телефондары буйынса шылтырата йәки Ҡырмыҫҡалы һәм Архангел райондары бу­йынса хәрби комиссариатҡа килергә мөмкин.
Фирүзә
РӘХМӘТУЛЛИНА.