Һырғанаҡтан тәмлекәстәр

 Мәҫәлән, шәкәр менән буталған һырғанаҡ хатта бәләкәй балаларға ла бик тә файҙалы. Уны әҙерләү өсөн  1 кг емешкә 2 кг шәкәр алына. Емештәрҙе блендерҙа ваҡлағандан һуң, шәкәр менән бутарға.  Һуңынан банкыларға һалып нығытырға ғына ҡала.

Үҙ һутындағы емеш

1:1 иҫәбендә һырғанаҡ менән шәкәр кәрәк. Емештәрҙе банкаларға һалып, өҫтөнә өймәләткәнсе шәкәр ҡомо һалырға һәм ҡапҡас менән ябып, 9 сәғәткә һалҡын урынға ҡуйырға. Емештең һуты сыҡҡас, банкаларҙы стерилләргә. (ярты литрлыларын – 10 минут, 1 литрлыларын 15 минут).

Һырғанаҡ һуты

Һырғанаҡ емештәренән бик тә файҙалы һут әҙерләргә мөмкин.  Бының өсөн һеҙгә күп кенә емеш кәрәк буласаҡ. Емештәрҙе һут һыҡҡыс аша үткәреп һутын алырға һәм 1 литр һутҡа 200 г шәкәр ҡомо иҫәбенән шәкәр өҫтәп, ҡайнар хәлгә еткергәнсе утҡа ҡуйырға.  Һуттың өҫтөндә майлы ғына пәрҙә барлыҡҡа килһә,  уны ташламағыҙ. Ул – бик файҙалы һырғанаҡ майы. Һутты стерилләнгән банкаларға һалып, ныҡ итеп ябығыҙ. Ҡышҡыһын һутты эсер алдынан яҡшы итеп болғатығыҙ.

Ҡайнатма

Емештәрҙе һалҡын һыуҙа йыуып алғандан һуң, 5 минут эҫе һыуҙа бешекләгеҙ. Һуңынан уларҙы тишекле сүмескә һалып, һыуын һарҡытығыҙ. Емештәрҙе бешекләгән һыуға 1 кг һырғанаҡҡа 1,5 кг шәкәр һәм 600 мл һыу иҫәбенән сығып шәкәр өҫтәгеҙ һәм сироп ҡайнатығыҙ. Емештәрҙең өҫтөнә  әҙер сиропты ҡойоп, ҡайнатып ҡына сығарығыҙ ҙа, шунда уҡ һүндерегеҙ.

Әҙер ҡайнатманы ҡоро банкаларға һалып, стерилләнгән ҡапҡастар менән ябығыҙ.

Фото:асыҡ сығанаҡтарҙан.