Электрон тәмәкенән 11 йәшлек ҡыҙ һәләк булған

Ҡот осҡос хәл Мәскәү өлкәһендә теркәлә.

Билдәле булыуынса, мәктәп уҡыусыһы әхирәтен ҡунаҡҡа саҡыра. Был ваҡытта ҡыҙҙың әсәһе эшкә китә, ә атаһы бөтөнләй булмай. Үҙҙәре генә ҡалған ике дуҫ "ололарса" ял итергә ҡарар итә. Бер ваҡыт ҡыҙҙың әхирәте йоҡлап китә, ә уянғанында кескәй хужабикә йән биргән була...

Фажиғә урынында төпсөктәр, зажигалка һәм электрон тәмәке табыла. Тикшереүселәр хәбәр итеүенсә, үлем сәбәбе - никотин менән ағыуланыу, үпкә спазмы һәм миокард инфаркты. Былар барыһы ла бер үк ваҡытта барлыҡҡа килә...

Үҫмерҙең яҡындарының ауыр ҡайғыһын уртаҡлашабыҙ. Хөрмәтле ата-әсәләр! Балаларығыҙ менән тәмәке, алкоголдең ниндәй эҙемтәләргә килтереүе хаҡында әңгәмәләр алып барығыҙ. Шулай уҡ ғәзиздәрегеҙҙең кемдәр менән дуҫ булыуы, ниндәй компанияла йөрөүе тураһында ҡыҙыҡһынып тороғоҙ. Һаҡланғанды Хоҙай һаҡлар тиҙәр бит...

Фото: социаль селтәрҙәр.