Ҡырҡ китап уҡы һәм бүләк от!

Конкурс ике турҙа үтә. Ойоштороусылар махсус төҙөлгән исемлек тәҡдим итә, ҡатнашырға теләүселәр шул исемлектән китаптарҙы табып уҡырға (электрон вариантта ла мөмкин) һәм был хаҡта социаль селтәрҙәрҙә яҙып һалырға тейеш.

Яҙмаға #БашкортостанЧитающий2024 #БашҡортостанУҡый2024 тигән хештегтарҙы ҡуйырға кәрәк – тик шул осраҡта ойоштороусылар һеҙҙең яҙманы күрә аласаҡ. Китап уҡыу туры 2025 йылдың 1 мартына тиклем дауам итә.

1 марттан 1 майға тиклем марафонда ҡатнашыусыларҙың белемен тикшереү өсөн тест үткәрелә. Ул турала мәғлүмәт һуңғараҡ Башҡорт телен һаҡлау һәм үҫтереү фондының “Бәйләнештә” социаль селтәрендәге төркөмөндә булыр.

Тест һөҙөмтәһендә 15 еңеүсе билдәләнә. Уларҙы ҡиммәтле бүләктәр, дипломдар көтә. Тест үтеүселәрҙең барыһына ла электрон ҡатнашыусы сертификаттары тапшырыласаҡ.

–  Китап уҡыу марафоны "Башҡортса интернет-серфинг" проектын тормошҡа ашырыу барышында үткәрелә, – тине Башҡорт телен һаҡлау һәм үҫтреү фонды етәксеһе Гөлназ Йосопова. – 2021 йылдан алып беҙҙең Фонд Башҡортостан Башлығы Гранты ярҙамында 16 проекты тормошҡа ашырҙы. Улар араһында – Башҡорт теленән халыҡ-ара диктант, башҡорт телен өйрәнергә теләүселәр өсөн мобиль ҡушымталар, өҫтәл уйындары һәм китаптар, интернет селтәрендә башҡорт телендәге контентты киңәйтеүгә йүнәлтелән проекттар.

Әҙәбиәт исемлеге:

1. Мөхәмәтсәлим Өмөтбаев “Башҡорттар”, “Өфөнөң тарихына ҡағылышлы материалдар”, “Башҡорт халҡының аҡ һәм ҡара көндәре” исемле тарихи-этнографик яҙмалары
2. Мөхәмәтша Буранғолов “Башҡорт туйы” драмаһы
3. М. Ғафури “Шағирҙың алтын приискыһында” повесы
4. Ризаитдин Фәхретдин “Ир балалар өсөн нәсихәт”тәре
5. Ғәлимов Сәләм “Бала” поэмаһы
6. Һәҙиә Дәүләтшина “Айбикә” повесы
7. Зәйнәб Биишева “Уйҙар, уйҙар” повесы
8. Фәрит Иҫәнғолов “Ҡышҡы йәйғор” повесы
9. Мостай Кәрим “Ай тотолған төндә” драмаһы
10. Кәтибә Кинйәбулатова “Атай тауышы” повесы
11. Кирәй Мәргән “Бөркөт ҡанаты” романының беренсе һәм икенсе китап тигән өлөштәре
12. Динис Исламов “Йәй башында” хикәйәһе
13. Ноғман Мусин “Һуңғы солоҡ” романы йә “Йыртҡыс тиреһе повесы
14. Рәшит Солтангәрәев “Хамбал” хикәйәһе
15. Әхиәр Хәкимов “Туй” повесы
16. Айһылыу Йәғәфәрова “Килендәр” романы
17. Талха Ғиниәтуллин - “Мәтрүшкә еҫе” хикәйәһе
18. Тамара Ғәниева “Алтын тамыр” хикәйәһе
19. Спартак Ильясов “Биғылый” роман-хәтирәһе
20. Сабир Шәрипов “Онотолған йыр” хикәйәһе
21. Гүзәл Ситдиҡова “Антоновка еҫе” повесы
22. Рамаҙан Өмөтбаев “Генерал Кусимов” документаль повесы
23. Рауил Бикбай “Һыуһаным, һыуҙар бирегеҙ” поэмаһы
24. Таңсулпан Ғарипова “Осона сыға алмайым бер уйҙың” хикәйәһе
25. Гөлнур Яҡупова “Сонар” хикәйәһе
26. Әмир Әминев “Сөңгөл” хикәйәһе
27. Мәрйәм Бураҡаева “Ҡорама юрған” хикәйәһе
28. Динис Бүләков “Йәшен атҡан имән” хикәйәһе
29. Наил Ғәйетбай “Бабич” романы
30. Гөлсирә Ғиззәтуллина “Яратам тип әйтеп өлгөрмәнем” хикәйәһе
31. Фәрзәнә Аҡбулатова “Ханбала менән хан бала” хикәйәһе
32. Мәүлиҙә Әхмәтйәнова “Яҡшы менән яман” хикәйәһе
33. Флүр Ғәлимов “Прометей. Олимп тауы ишелеүе” трагедияһы
34. Мөнир Ҡунафин “Соҡор” хикәйәһе
35. Миләүшә Ҡаһарманова “Хыял” хикәйәһе
36. Зөлфиә Ханнанова “Таш ҡатын” шиғырҙар йыйынтығы
37. Салауат Әбүзәр “Мәмерйә” хикәйәһе
38. Айгиз Баймөхәмәтов “Урам балалары” повесы
39. Гөлнара Хәлфетдинова “Бешкәк” поэмаһы
40. Айгөл Йәмилева “Сынаяҡтағы донъя” повесы

Фото: Башҡорт телен һаҡлау һәм үҫтереү фонды.