Шок: Өйҙө йәшен атҡан!

Күгәрсен районының Мәҡсүт ауылында биш фатирлы торлаҡ йорт янған. Унда һынау янғын лабораторияһы эксперты эшләй, янғын сәбәптәренең бер нисә версияһы ҡарала, шул иҫәптән йәшен разряды...

Рәсәй Ғәҙәттән тыш хәлдәр министрлығының янғын һүндереүселәре һәм ирекмәндәр килеп еткән мәлдә йорттоң ҡыйығы янған була. Утты һүндереүгә 23 янғын һүндереүсе һәм 7 берәмек техника йәлеп ителә. Янғын 450 квадрат метр майҙанда һүндерелә. Зыян күреүселәр юҡ.

Биш фатирҙың өсөһөндә 10 кеше, шул иҫәптән 5 бала йәшәгән. Район хакимиәте янғындан зыян күреүселәргә ярҙам итеү мәсьәләһен хәл итә. Әлегә улар туғандарында.

Рәсәй Ғәҙәттән тыш хәлдәр министрлығы йәшен ваҡытында йортто нисек һаҡларға кәрәклеген иҫкә төшөрә: иң ышаныслы ысул - бинаға йәшендән һаҡлау системаһын урынлаштырыу. Ул йәшенде "тотоп", разрядты ергә ебәрә, йортҡа бер ниндәй ҙә зыян килтермәй.

Фото: МЧС РБ.

Автор:Баныу Ҡаһарманова

Сығанаҡ: Йәшлек гәзите