Гражданлыҡ никахы заман заңымы әллә гонаһмы?

Бөгөн тормошобоҙға “гражданлыҡ никахы” тигән төшөнсә ныҡлы килеп инде. Айырыуса ҙур ҡалаларҙа күптәр мөнәсәбәттәрен рәсмиләштермәйенсә йәшәүҙе хуп күрә. Йәштәр быны бер-береһен яҡшыраҡ белеү, ғаилә тормошона өйрәнеү теләге менән аңлата. Шул уҡ ваҡытта үҙаллы тормош юлына яңы баҫҡан егеттәр һәм ҡыҙҙар ғына түгел, ярайһы уҡ йәштәге – 35-тән олораҡтар араһында ла гражданлыҡ никахы менән йәшәгәндәр бик күп.

Белгестәр билдәләүенсә, элегерәк гражданлыҡ никахы ир-егеттәр өсөн “уңайлы вариант” һаналды, ә һуңғы йылдарҙа тормош тәжрибәһенә эйә, ныҡлы аяҡҡа баҫҡан, үҙенә ышанған ҡатын-ҡыҙҙар, кейәүгә сыҡҡан хәлдә лә, тап ошондай төр мөнәсәбәткә өҫтөнлөк бирә икән. Быны улар һәр төрлө “альфонстарҙан” һаҡланыу, бойондороҡһоҙлоғон юғалтмау теләге менән аңалата.

Ә динебеҙ нимә ти? Иң башта бер хәҙис.

Пәйғәмбәребеҙ (С.Ғ.С) ваҡытында була был хәл. Пәйғәмбәр (С.Ғ.С) янына бер йәш егет килә лә: “Эй Аллаһ илсеһе, миңә зина ҡылырға рөхсәт ит әле”, - ти. Уның янындағы кешеләр: “Тутҡта! Туҡта!” – тип асыулана башлай. Пәйғәмбәребеҙ (С.Ғ.С) уға: “Яҡыныраҡ кил”, - тип янына ултырта һәм: “Һин ошоно үҙеңдең әсәйеңә теләр инеңме?” – тип һорай. “Юҡ, Аллаһы Тәғәлә менән ант итәм! Теләмәйем”, - тип яуаплай егет. Пәйғәмбәребеҙ (С.Ғ.С): “Кешеләр ҙә быны үҙ әсәйҙәренә теләмәй”, - ти. Шунан Пәйғәмбәребеҙ (С.Ғ.С) тағы ла һорай: “Һин шуны үҙ ҡыҙыңа теләр инеңме?”. Егет тағы “юҡ” тип яуап ҡайтара. Пәйғәмбәребеҙ (С.Ғ.С): “Кешеләр ҙә быны үҙ ҡыҙҙарына теләмәй”, - ти. Шулай итеп, Пәйғәмбәребеҙ (С.Ғ.С) егеттән һеңлеләре, апайҙары тураһында һорай ҙа, ҡулын егеттең иңенә ҡуйып: “Йә, Аллаһ, уның гонаһтарын ғәфү ит, йөрәген таҙарт, ағзаһын ғиффәтле ҡыл”, - тип доға ҡыла. Бынан һуң был егет гонаһлы булған ғәмәлдәрҙән бер нимәгә лә ҡарамаҫ була (Имам Әхмәт риүәйәте, сәхих хәдис).

Ҡөрьәндә был хаҡта бына нисек әйтелә: Раббыбыҙ зина ҡылма тимәй, ә тағы ла нығыраҡ итеп киҫәтә: “Зинаға яҡын да бармағыҙ (уның сәбәптәренән дә йыраҡ булығыҙ), сөнки ул – бысраҡ эш һәм бик яман ҡәбәхәт юлдыр”.

Заман башҡа – заң башҡа тиһәк тә, иң яҡшыһы – йәштәрҙең матур итеп дуҫлашып, ата-әсә фатихаһын алып, Аллаһы Тәғәлә алдында мөхәббәттәренең саф, таҙа, ныҡлы булыуын раҫлап, бер-береһенә мәңге тоғро булырға һүҙ биреп никахлашыуы, ЗАГС органында мөнәсәбәттәрен матур итеп рәсмиләштереүе.

Ә һеҙ нисек уйлайһығыҙ? Гражданлыҡ никахына мөнәсәбәтегеҙ нисек?

Тулырак: https://shahrikazan.ru/news/din/ir-keshe-beln-khatyn-kyzny-nikakhsyz-khld-ensi-mnsbtk-kere-turynda

Фото: Ф.Рәхмәтуллина