Ауылыбыҙ киләсәге – үҙебеҙҙең ҡулда

2023 йыл республикала Атайсал өсөн изге ғәмәлдәр йылы тип иғлан ителде. Ошо уңайҙан ул “Атайсалға – изге ғәмәлдәр” девизы аҫтында үтә. Атайсал – ул һинең кендек ҡаның тамған ер. Тыуған ауылыңды яратыу һинең ҡаныңда булырға тейеш. Һәр кем үҙен уратып алған мөхитен, тирә яғын бик ҡәҙерләп, яҡлап, хәстәрләп торорға тейеш. Шул саҡта ғына ул сәскә атасаҡ. Тыуған еренә, ауылыбыҙҙың яҙмышына битараф булмаған кешеләр беҙҙә бихисап.

Алайғыр ауылы халҡы ла үҙ тыуған төйәгенә изгелек эшләү ниәте менән ауыл эргәһендәге күл буйына шыршы үҫен­теләре ултыртырға өмәгә сыҡты. Һуңынан мәсет, клуб эргәләре йәшеллән­дерелде. Был изге эште ауылыбыҙ старос­таһы Тимур Абдрах­манов, Фә­нис Ғилманов һәм Илшат Ғәйнул­линдар инициа­тива күр­һәтеп, ойошто­роп ебәр­ҙеләр. Ярҙамға үҙ трак­торы менән Фәнзил Нәзиров та килде.
Әйткәндәй, Фидаил Нәжип улы Ғилманов өс-дүрт йыл элек күл янын кәртәләп ағас­тар ултырта башлағайны. Был эште ул Себер тарафтарында бергә эшләп ҡайтҡан ауыл­дашы, дуҫы Фәнис Ғил­манов менән башлап ебәрҙе. Ҡыҙғанысҡа ҡар­шы, Фидаил Нәжип улы барыбыҙҙы ла оло ҡайғы­ларға һалып, ба­ҡый­лыҡҡа күсте. Атай­салым тип, янып-көйөп йәшә­не, ауылға һыу, газ үткә­реү буйынса ла ауыл, ра­йон хакимиәттәре тупһа­һын күп тапаны ул. Алла­ға шөкөр, хәҙер ауылы­быҙҙа газ да, һыу ҙа бар.
Уның изге ниәтен дауам итеп, ауылдаштары бөгөн ағас ултырттылар, ир-егеттең изге ғәмәл­дәре беҙҙең күңелдәрҙә мәңге һаҡланасаҡ, тип уны йылы һүҙҙәр, яҡты хәтирәләр менән иҫкә алдылар, мәсетебеҙҙең имам-хатибы Әхәт Ишем­ғолов уның рухына бағышлап аят та уҡыны.
Ағас ул кеше ғүмеренә оҡшаш. Тамыры - үткән ғүмеребеҙ, олоно – хәҙер­геһе, ботаҡтары киләсә­гебеҙ. Тиҙҙән үҫентеләр шәбәйеп үҫеп китерҙәр, ауылыбыҙҙы йәмләп матур бер парк барлыҡҡа килер, ағастарға ҡоштар ҡунып һайрар, илебеҙгә тыныслыҡ килер, егеттә­ребеҙ иҫән-һау тыуған йорттарына ҡайтырҙар, тигән теләктә таралышты өмәселәр.
Ауылыбыҙ киләсәге – үҙебеҙҙең ҡулда!
Әлфиә ИРМӘКОВА.
Алайғыр ауылы.