Сибай башлығы ҡорбан салдырған

Сибай ҡалаһы хакимиәте башлығы Азамат Юлдашбаев махсус хәрби операцияла ҡатнашыусыларҙың именлеге өсөн ҡорбан салдырған һәм православие ҡорамына ғибәҙәт ҡылыуға заказ биргән. Был хаҡта ул "Бәйләнештә"ге социаль селтәрендәге сәхифәһендә яҙған.

– Ҡорбан ашы үткәрҙек. Алтын биҫтәһендәге мәсеттә махсус хәрби операцияла ҡатнашҡан егеттәрҙең имен йөрөп ҡайтыуын теләп доғалар ҡылдыҡ. Православие динен тотоусылар өсөн «Отрада и Утешение» ҡорамына ғибәҙәт ҡылыуға заказ бирҙем. Егеттәребеҙҙең һәр береһенә доға уҡыласаҡ. Беҙҙең изге доғалар ҡабул булыр тип ышанам, – тип яҙған Азамат Юлдашбаев.

Барлыҡ ир-егеттәргә лә имен-һау әйләнеп ҡайтырға яҙһын! Ил-йорт тыныс булһын!

Фото: Азамат Юлдашбаевтың "Бәйләнештә"ге сәхифәһенән.

Автор:Карима Усманова

https://bashgazet.ru/articles/y-m-i-t/2022-12-07/sibay-bashly-y-orban-saldyr-an-3060765