Урам һепереүсе Юра ҡайҙа юғалды?

Өфөнән данлыҡлы урам һепереүсеһе Юра Петровский ҡалаһына (Луганск Халыҡ Республикаһы) киткән икән. Ул, Башҡортостандан башҡа эшселәр кеүек үк, ЛНР-ҙа тыныс тормошто тергеҙеү саҡырыуы буйынса эшкә юлланған.

- Мин Петровскийға 20 июлдә Өфөнән ярҙамсы эшселәр составында килдем. Кәрәк булғандың барыһын да эшләйбеҙ - ихаталарҙы һеперәбеҙ, сүп-сарҙы йыябыҙ, шул иҫәптән төҙөлөш, тротуарҙарҙы һеперәбеҙ. Йөктө бушатыу, тейәү эштәре менән шөғөлләнәм, - ти Юрий Ветлугин.

Юрий Ветлугин "Башинформ" хәбәрсеһенә сәфәренең тәүге көндәрендә үҙенең тулҡынланыуы тураһында ла һөйләгән, сөнки ЛНР-ҙа әлегәсә  хәл тотороҡло түгел.

"Иртән үҙенсәлекле, әммә алыҫта тауыштар ишеттем. Һуңынан уларға иғтибар итмәй башланым. Кеше һәр нәмәгә өйрәнә. Хәрби автомобилдәрҙе даими күрәбеҙ. Аҙыҡ-түлек алырға йөрөйҙәр, күрәһең. Ә былай, бында барыһы ла тыныс ҡына. Төҙөлөш эштәре бара. Аңлайым, беҙ бында юҡҡа ғына түгел. Ҡаланы тергеҙәбеҙ. Күҙ алдында мәктәп үҙгәрә. Мин һәм иптәштәрем ошо процестың бер өлөшө булыуыбыҙға бик шатмын", - ти ул.

Хәтерегеҙгә төшөрәбеҙ, яҡташтарыбыҙ бында ҡаланың 22-се урта мәктәбен тергеҙә. Белем усағы Рәсәй Геройы, генерал-майор Миңлеғәле Шайморатовтың исемен йөрөтә. 1 сентябрҙә Петровский ҡалаһының яңыртылған мәктәбенә иллегә яҡын бала уҡырға киләсәк.

Хәтерегеҙгә төшөрәбеҙ, Юрий Өфө фотографы Роман Филиппов арҡылы танылыу яуланы. Халыҡ урам һепереүсенең ҡыҙғаныс хәле тураһында күреп-ишетеп, тиҙ арала ярҙам ойошторҙо, мут әҙәмдәр батырған кредит һаҙлығынан ҡотолор өсөн аҡса йыйҙы. Шунан алып ирҙең тормошо ҡырҡа үҙгәрҙе.

Фото: "Башинформ"