Лагерҙа бик күңелле

Унда аҙ тәьмин ителгән һәм күп балалы ғаиләлә, яңғыҙ әсә ҡарамағында үҫкән һәм тәр­биәләнгән, балиғ булмағандар эштәре буйынса комиссияла тороусы бөтәһе егерме ике бала ял итә. Лагерҙың үҙенсәлеге – ялан шарттарында палаткаларҙа йәшәү, усаҡта аш-һыу әҙерләү, хәрбиләштерелгән тематик дәрестәр үткәреү. Балалар ике аҙна эсендә ял итеп кенә ҡал­май, физик әҙерлек менән шө­ғөл­ләнә һәм башланғыс хәрби әҙерлек буйынса күнекмәләр үтә. Бынан тыш, унда йыр­лайҙар, бейейҙәр һәм башҡа төр мауығыуҙар бар.
- Балаларҙың ялы файҙалы һәм күңелле үтһен өсөн бары­һын да эшләргә тырышабыҙ. Лагерь башланғыс хәрби әҙер­лек профилле булғас, балаларҙа тыуған илгә һөйөү, патриотик рух тәрбиәләү маҡсатында йүнәлеш алып барабыҙ. Төрлө хәрби әҙерлек күнекмәләр эш­ләү­ҙән тыш, концерт но­мер­ҙары әҙерләйбеҙ. Көнөбөҙ иртәнге сәғәт һигеҙҙән башлана. Балалар менән саф һауала зарядкаға баҫабыҙ, йүге­рәбеҙ. Төшкө аш­тан һуң күлдә һыу инәбеҙ, ката­марандарҙа йө­ҙәбеҙ, ә кисен усаҡ янында үткән көнгә йомғаҡ яһайбыҙ, тәьҫораттар менән бүлешәбеҙ. Лагерҙа шулай уҡ тарих, география, бизнес көн­дәре лә бар. Балалар баш­ланғыс хәрби әҙерлек күнек­мәләре ме­нән шөғөл­ләнһен өсөн майҙан­сыҡта траншеялар ҡаҙылған, ҡар­­­­шы­­лыҡтар һы­ҙаты, спорт инвентарҙары ҡу­йыл­ған. Туҡ­ланыу бик яҡшы ойош­торолған. Көнөнә биш тапҡыр ашайҙар. Ялан кух­няһында де­жур­лыҡ итә­беҙ. Унда балалар аш­наҡсы­ларға аш әҙерләргә яр­ҙам итә. Аш-һыу әҙерләү оҫтала­ры бала­лар­ҙы көн һайын тәмле һәм туҡлыҡлы ризыҡтар менән һыйлай,- ти лагерь директоры Владлен Курунов.
Өлкән вожатый Гөлнара Севастьянова, вожатыйҙар Карина Мөхәмәтова, Элина Фәт­­ҡул­лина, Руслан Карпов лагерь тормошон йәнле, ҡыҙыҡлы итеүҙә, балаларҙың һәр көнөн файҙалы һәм мауыҡтырғыс итеп ойоштороу өсөн тырышалар.
- Лагерҙа икенсе тапҡырмын – беренсеһендә ял итеүсе була­раҡ килһәм, быйыл вожатый булырға теләк белдерҙем. Лагер­ҙа ике отряд төҙөлгән. Береһе, нигеҙҙә, мәҙәни-күңел асыу программалары әҙерләй, икенсе отряд физик әҙерлек менән шөғөлләнә. Балалар бөтә сара­ларҙа ла бик әүҙем ҡат­нашалар. Улар өсөн хәрби-спорт уйындарын үҙенсәлекле ойош­тороуҙы, бер-беребеҙгә ярҙам итеп, бер ғаилә булып йәшәү рәүешен алғы планға ҡуй­ғанбыҙ,- ти Руслан Карпов.
- Прибельский мәктәбенең 5-се класын тамамланым. Бын­да миңә бик оҡшай, тәмле ашаталар. Иртән бутҡа, какао, тө­шөн аш, кискә былау бирә­ләр. Төрлө хәрби күнекмәләрҙә ҡатнашам. Бында ҡаршылыҡ һыҙаттарҙы үтеп, үҙемде көслө, ғәйрәтле, баһадир итеп тоям. Бынан тыш, концерт программаларында бейергә яратам. Бында бик рәхәт, тиҫтерҙәрем менән дуҫлашып та бөттөк,- ти Ильяс Карпов.
Олокүл ауылынан Мария Севастьянова ла лагерҙа алған тәьҫораттары менән бүлеште.
- Бында бик оҡшай. Ялан шарттарында палаткаларҙа йә­шәүе ҡыҙыҡ. Иртәнсәк ҡоштар һайрауына уяныу - үҙе бер кинә­нес. Көндәребеҙ мауыҡ­тырғыс ваҡиғаларға бай. Нептун көнө бер кемде лә битараф ҡалдыр­мағандыр. Был лагерҙа мин тәүге тапҡыр. Икенсе йылға тағы ла киләсәкмен,- ти Мария.
Йәйге матур мәл бик тиҙ үтә. Шуға күрә ошо ваҡытта бала­лар­ҙың сынығып, ҙурайып, һау­лы­ғын нығытып, яңы көс менән уҡыу йылын башлауын теләйбеҙ.
Фирүзә РӘХМӘТУЛЛИНА.