“Омикрон”дан тауышың бөтһә...

“Омикрон” йоҡторған күптәр тамаҡ ауыртыуға, тауыш “ултырыуға”,  хатта уның юғалыуына зарлана. Вирус ни рәүешле тауышты  “бөтөрә”?  “Российская газета” баҫмаһына биргән интервьюһында табип-оториноларинголог Аза Мәхмүдова шул турала бәйән итә.

 – “Омикрон” ковидтың башҡа төрҙәренә ҡарағанда үпкәгә һирәгерәк эләгә, сөнки вирус өҫкө тын юлдарында оҙаҡҡа “тотҡарлана”.  Был иһә фарингитҡа – йотҡолоҡтоң артҡы стенкаһы ялҡынһыныуына килтерә. Ялҡынһыныу төпкәрәк төшкәндә ларингит башлана, тамаҡ һәм тауыш бәйләүестәре зарарлана. Шул сәбәпле тауыш үҙгәрә, йә бөтә, – тип аңлата табип.

Ул инфекция арҡаһында тамаҡтары ауыртҡан кешеләргә бер нисә ябай ғына кәңәш бирә:

 – һауаны дымландырыусы ҡорамалдар файҙаланығыҙ  – бүлмәләге һауа дымлылығы 35-40 проценттан күберәк булырға тейеш. Ҡышын, ғәҙәттә, йылытыу батареялары ҡыҙыу булыу арҡаһында фатирҙа һауа бик ҡоро була;

– тамаҡ ауыртыуын кәметеү өсөн, эвкалипт, шалфей кеүек үҫемлек экстракттары ҡушылған  шифалы “ҡаҡ” (пастилка) һурырға мөмкин. Улар ялҡынһыныуҙы кәметә һәм тамаҡтың лайлалы тышсаһын еүешләүсе төкөрөк бүленеп сығыуына булышлыҡ итә;

– тамаҡ ауыртҡанда дарыуҙарҙы табип тәғәйенләүе буйынса ғына эсергә кәрәк. Әгәр тауыш өс көндән ашыу асылмай икән, табип-оториноларингологҡа мөрәжәғәт итеү мотлаҡ.