Батырлыҡҡа тиң һөнәр

Изге һөнәр эйәләренең һөнәри бай­рам­дары алдынан Алайғыр табиплыҡ ам­булаторияһы терапевы, Башҡортостан Рес­публикаһының атҡаҙанған табибы, юғары категориялы белгес Зәлифә Батта­лова менән осраштыҡ. Зәлифә Миңләхмәт ҡыҙының кешеләр һаулығы һағында тороуына 46 йыл: тәүҙә 10 йыл шәфҡәт туташы булып эшләһә, ҡалған йылда – табип-терапевт эшендә.
- Беҙ мәктәпте тамамлаған йылдарҙа күп ауыл ҡыҙҙары йә уҡытыусы, йә медицина хеҙмәткәре булырға теләй ине. Класыбыҙҙан өс ҡыҙ медицина юлынан киттек. Һуңғы йылдарҙа ауырыған атайым­дың хәлен еңеләйткем килеү ҙә, моғайын, быға булышлыҡ иткәндер – мин икеләнеп тә тормайынса, документтарымды Стәр­ле­тамаҡ медицина училищеһына тапшыр­ҙым, - тип һөйләне ул.
Тыумышы менән Стәрлебаш райо­ны­нан булған Зәлифә Миңләхмәт ҡыҙы был уҡыу йортонда шәфҡәт туташы дипломын алғас, юллама буйынса беҙҙең районға эшкә килә.
Зәлифә Батталова район үҙәк дауахана­һының терапия бүлегендә - процедуралар, балалар бүлексәһендә шәфҡәт туташы була, ярты ставкаға өлкән шәфҡәт туташы эшен дә башҡара. Процедуралар үткәреү, тәғәйенләнгән уколдар яһау ҙур яуаплылыҡ талап итә. Иғтибарлы булырға кәрәк, хаталанырға ярамай. Был йылдарҙа ул ҙур тәжрибә туплай.
Тиҙҙән буласаҡ тормош иптәше Ғәли Гәрәй улын осрата. Яңы ғаилә барлыҡҡа килеп, бер-бер артлы ике ҡыҙҙары донъяға килә. Шунан, медицина училищеһын та­мамлағанға ун йыл тигәндә Башҡорт дәү­ләт медицина институтына уҡырға барырға ҡарар итә. Хыялы тормошҡа аша: ул медицина институты студенты булып китә.

Ғаиләһе менән студенттарҙың дөйөм ятағында йәшәйҙәр: береһе уҡый, икенсеһе эшләй, ә сабыйҙар тәүҙә балалар баҡ­саһына йөрөйҙәр, аҙаҡ мәктәптә уҡыйҙар. Тырыш, егәрле, маҡсатҡа ынтылыусан, медицинаны ныҡлап үҙләштереүгә теләге көслө булған ҡатын барыһына ла өлгөрә. Ғаилә мәшәҡәт­тәре күп булһа ла, яҡшы уҡый, ғаиләһендә хәс­тәрлекле ҡатын һәм әсәй була. Һигеҙ йыл “һә” тигәнсе уҙып китә, уның бер йылы республика клиник дауаханаһында интернатурала үтә.Баш ҡалала ҡалыу мөмкинселеге булһа ла, йәш ғаилә Ҡырмыҫҡалыға ҡайтыуҙы һайлай. 1993 йылда Зәлифә Миңләхмәт ҡыҙы үҙәк район дауаха­наһына эшкә урынлаша. Тәүҙә поликлиникала функциональ диагностика бүлмәһендә хеҙмәт юлын башлай, шунан стационарға – терапия бүлексәһенә күсә. Шулай ҙа функциональ диагностика буйынса белеме уға ғүмер буйы кәрәк була – тик­шереүҙәрҙе үҙе ҡарап уҡый һәм тәғәйенләй. Бында табип-терапевт та, ҡайһы бер йылдарҙа бүлексә мөдире лә була.
2007 йылда белгес Алайғыр участка дауа­ханаһына (хәҙер табиплыҡ амбулаторияһы) күсә. Бында стационар булған саҡта дауалаусы терапевт, шул уҡ ваҡытта пациенттарҙы ҡабул итеүсе табип эше лә йөкмәтелә. Эшләү дәүе­рендә белеме, табиплыҡ таланты һәм кеше­лек­ле мөнәсәбәте арҡаһында ул халыҡ араһында абруй ҡаҙана. Тәжрибәле табипҡа дауаланыу­сылар теләп килә. Үтә лә яуаплы һөнәрҙе һайлаған белгестең фиҙаҡәр хеҙмәте етәкселәр тарафынан да лайыҡлы баһалана. Күп һанлы наградалар араһында РФ Маҡтау ҡағыҙы ла бар.
- Һөнәрҙе яратып башҡарырға кәрәк. Һәр саҡта ла медицина хеҙмәткәре иңенә ҙур яуаплылыҡ һалына. Участка хеҙмәтенең бурыстарына участка эшен ойоштороу, документтар тултырыу, пациенттарҙы ҡабул итеүҙәр, мөрәжәғәт итеүселәргә тейешле ярҙам күрһәтеү, дарыуҙар тәғәйенләү, диспан­сери­за­ция үткәреү, заманса электрон вариант менән эшләү, профилактик вакцинациялар үткәреү, шул иҫәптә һуңғы йылда корона­вирусҡа ҡаршы вакцинация һәм башҡалар инә. Шулай уҡ хәүефле ко­ронавирус менән ауыры­ғандарҙы асыҡлау, уларҙы күҙәтеү аҫ­тында тотоу, дауалау, кәрәк саҡта госпиталгә оҙатыу эштәре өҫтәлде. Хәҙер инде участка терапевына талаптар бигерәк тә күп. Һәр саҡ камиллашырға, бының өсөн күп уҡырға, методик ҡулланмаларҙы өйрәнергә кәрәк. Дарыуҙар үҙгәреп тора, шуға һәр яңы­лыҡты белеп, хәбәрҙар булып торорға тура килә. Шулай ҙа һөнәремде бик яратам, па­циент­­тарымды дауалағандан ҡәнәғәтлек кисе­рәм. Тик кешеләр ҙә үҙҙәренең сәләмәт­легенә иғтибарлы булһын ине. Диспансе­ризация үтергә, профилактик тикшереүҙәргә йөрөргә кәңәш итәм. Диспансеризация ауы­рыу­ҙарҙы алдан асыҡларға ярҙам итә. Хәүефле сирҙәрҙе иртәрәк асыҡлағанда ғүмерҙе һаҡлап ҡалып була. Һаулыҡтың ныҡлылығы кешенең үҙенән тороуын онотмаһындар ине, - ти халыҡ сәләмәтлеге өсөн борсолған изге һөнәр эйәһе.
Табибәнең һүҙҙәре буйынса, коллектив бер бөтөн, берҙәм булып эшләгәндә генә эш еңелерәк бара. “Бер-беребеҙҙе тыңлап, ярты һүҙ­ҙән аңлап, кәрәк саҡта ярҙам итешеп хеҙ­мәт итәбеҙ”, - тип хеҙмәттәштәре тураһында ла йылы һүҙҙәрен әйтте ул.
Зәлифә Миңләхмәт ҡыҙы йортонда ҡәҙерле әсәй, өләсәй. Ҡыҙҙары үҙ юлдары менән китеп, Өфө ҡалаһында эшләп йөрөйҙәр. Айгөл Баш­ҡорт дәүләт медицина университетының фармацевтика бүлеген тамамлаған, Альбина Өфө дәүләт авиация-техник университетын тамамлап, иҡтисадсы һөнәрен ала. Ҡыҙғанысҡа, тормош иптәше Ғәли Гәрәй улы ун йыл элек вафат булған... Әлеге көндә әсәһе, тыл ветераны Мөзәйнә Зиннәтулла ҡыҙы уның ҡарамағында. Ҡәҙерле кешеһенә тейешенсә тәрбиә биреп, йылы мөнәсәбәт күрһәтеп йәшәйҙәр.
Батырлыҡҡа тиң табиплыҡ һөнәрен һайлап, халыҡ сәләмәтлеге өсөн борсолған һәм уның ке­үек үҙ эшен яратып башҡарған, дауалауҙан ҡә­нәғәтлек алған белгестәр күберәк булһын ине.
Фәниә Сәлимгәрәева.
Автор фотоһы.