Ул эштән китергә йыйынған булған...

Социаль селтәрҙәр 26 йәшлек инглиз теле уҡытыусыһы Эльвира Игнатьеваның фотолары менән тулған. Беҙгә йәш, һылыу, күҙҙәрендә нур балҡып торған уҡытыусы ҡыҙ ҡарай. Тик ул бөгөн яҡты донъяла юҡ инде.

Эльвира Ҡазанда тыуып үҫкән. Яҡындары һөйләүе буйынса, уҡытыусы тауыш ишетеп, коридорға сыға. Енәйәтсе уны шунда уҡ атып үлтерә. Эльвира кәүҙәһе менән балаларҙы ҡапларға тырыша ла бит, тик утлы ҡоралға ҡаршы тороп буламы? Унан һуң енәйәтсе 8-се класс уҡыусыларына ҡорал төбәй...

Туғандары һуңғы мәлгә тиклем Эльвираның иҫән ҡалырына ышана, тик, ҡыҙғанысҡа ҡаршы, ағаһы мәйетханаға барып кәүҙәһен таный.

Эльвира Ҡазан федераль университетын ҡыҙыл дипломға тамамлай. 2018 йылда “Йыл уҡытыусыһы” конкурсында ҡатнашып грант ота. Балаларҙы ныҡ яратҡан була. Һөнәре буйынса даими үҫешкә, камиллашыуға ынтыла.

Шул уҡ ваҡытта уның мәктәптән, мәғариф системаһынан арығанлығы тураһында ла билдәле. Бар күңелен уҡыусыларына бирә, һөҙөмтәлә ял итергә ваҡыты ла етмәгән. Арыуы сәбәпле эшен ҡалдырырға йыйынған. Тик класс етәксеһе булғанлыҡтан, май аҙағына тиклем уҡытырға, класын тапшырырға йыйынған. Өҫтәүенә конкурста алған грантының срогы ла май аҙағында сығырға тейеш булған.

Әммә Эльвира өлгөрмәй... Кисә уны Ҡазанда ерләнеләр. Йәнең Йәннәттә булһын, уҡытыусы...

Фото: Инстаграм.