Даирә
-6 °С
Болотло
75 лет Победы
Бөтә яңылыҡтар
Башҡа яңылыҡтар
6 Май 2021, 13:45

Ветерандар әле лә сафта

Районда ветерандар Советы уңышлы һәм әүҙем эшләп килә. Ниндәй генә саралар уҙғарылмаһын, уҙамандарыбыҙ һәр сарала тырышып ҡатнаша. Оло быуын кешеләренең актив тормош алып барыуы хаҡында ветерандар Советы рәйесе Абдулхай Лотфулла улы Мөхәмәтйәнов менән әңгәмә ҡорҙоҡ.

- Абдулхай Лотфулла улы, ветерандар Советына нисә йыл етәкселек итәһегеҙ?
- 2012 йылдан алып был йәмәғәтселек ойошмаһында рәйес булып торам. Мин эшләй башлаған осорҙа уҙамандар ара­һын­да 60-лап Бөйөк Ватан һуғышы вете­раны бар ине. Ғүмер ағышын туҡтатып булмай, бы­йыл Бөйөк Еңеүҙе 8 генә яугир ҡаршылай... Шулай уҡ тыл ветерандары һәм барлыҡ хаҡлы ялдағылар ҙа байтаҡ.

- Һеҙ етәкләгән ойошманың маҡсатын билдәләп үтһәгеҙ ине.
- Райондың йәмәғәтселек тормо­шонан ситтә ҡалмайынса, йәш быуынға патриотик тәрбиә биреү өсөн актив йүнәлештә эш­ләйбеҙ. Һәр бер вете­раны­быҙҙы күҙ уңынан ысҡындырмайбыҙ, хәлдәрен белергә тырышабыҙ.
- Был ваҡыт эсендә башҡарылған мөһим эштәргә туҡталып китәйек әле..

- Өлкән кешеләрҙең хәлдәрен бел­е­шеү, Бөйөк Ватан һуғышы ветеран­дарының юбилейҙарын иғтибарҙан ситтә ҡалдырмау, шулай уҡ уларҙы һуңғы юлға оҙатыуҙа ҡатнашыу – көндәлек эштәр. Бынан тыш, Бөйөк Еңеүҙең 70 һәм 75 йыллыҡтарын уҙ­ғарыуға әҙерлек эштәре алып барылды. Колхоздар ваҡытында төҙөлгән иҫтәлекле урындар - һәйкәлдәр, обелискылар, стела­лар иҫкерҙе. Шуға күрә уларҙы яңыртыу буйынса ҙур эштәр башҡарылды. Мәҫәлән, Үрге Төкөн, Тү­бән­ге Төкөн, Малай, Кә­сеүән, Илтуған, Березовка, Иҫке Бәпес, Николаевка, Ибраһим, Иҫке Шәрәй, Һарт-Науруз һәм Һарт-Шишмә ауылдарында Бөйөк Ватан һуғышында һәләк булғандар, ҡатнашыу­сылар һәм тыуған ерҙәренә ҡай­тып баҡыйлыҡҡа күскәндәр иҫтәлегенә тәү башлап ҡуйылһа, Һәүәләйҙә элеккеһе һүтелеп, яңыртылды, Олокүлдә лә яңыһы урынлаштырылды. Прибельскийҙа иҫтә­лекле урынға реконст­рукция уҙғарылды. Ҡырмыҫҡалы ауылы буйынса Еңеү пар­кында һуғышта ҡатна­шыу­сыларҙың исем­леге яңыртылды. Элек яуҙа баштарын һалған­дарҙың ғына исем-шә­рифтәре булһа, хәҙер ҡайтҡас баҡыйлыҡҡа күс­кәндәрҙең дә исемдәре ҡуйылды.
Шулай уҡ һуғыш һәм унан һуңғы йылдарҙа хужалыҡты тергеҙеүҙә ҡат­нашҡан тыл хеҙмәтсәндәрен дә оноторға хаҡыбыҙ юҡ. Ошо маҡсатта уҙған йыл район хакимиәтендә күргәҙмә залы ойошторолдо. Колхоз рәйестәре, фиҙаҡәр хеҙмәт итеүсе эшсәндәр тураһында иҫтә­лектәр тупланған китап-альбом сыға­рылды. Районда барлығы 44 кеше Ленин орденын, 3 кеше Социа­листик Хеҙмәт Геройы (Раил Камалов, Фәрит Садиҡов һәм Банат Батырова) исемдәрен алды. Уларҙан тәүге икәүһе ике тапҡыр Ленин орденына ла лайыҡ була. Миңә был кешеләрҙе күреү, улар менән бер осорҙа эшләү, аралашыу бәхете тейҙе. Зама­нында беҙҙең район хеҙмәттәге ҡаҙа­ныштары өсөн дүрт Ҡыҙыл Байраҡҡа лайыҡ була. Ҡыҙғанысҡа күрә, уларҙың береһен генә табып булды...

16 ауыл Советы биләмәһендә урын­лаш­ҡан колхоздарҙағы Хөкүмәт награ­далары алған алдынғы колхозсылар тураһында фотолар менән мәғлүмәттәр йыйҙым. Улар бер китап йәки һәр бер ауыл Советы хакимиәте тарафынан үҙҙәренә ҡағылыш­лыһын алып, иҫтәлек өсөн буклет итеп сығарылһа, яҡшы булыр ине...

- Ниндәй ауыл Советтарындағы баш­ланғыс ветерандар ойошмаһының эштәре маҡтауға лайыҡ?
- 16 ауыл биләмәһенең һәр береһендә башланғыс ветерандар ойошмалары бар. Иҫке Бәпестән Нурия Иштуғанова, Ҡабаҡтан Рауил Ғәниев, Прибельскийҙан Рәшит Гәрәев, Шайморатовтан Әфҡәт Ниғмәтуллин һәм башҡалар байтаҡ йылдар үҙ бурыстарын уңышлы башҡара. Ғөмүмән, ветерандар советы етәкселәре - халыҡты, уның көнкүрешен, пробле­маларын белгән, өҫтәге етәкселәр менән бәйләнештә торған, идеяларын тормошҡа ашыра алған, ойоштороу эшенә һәләтле булған әүҙем кешеләр. Улар кәрәк икән, ауыл Советы, кәрәк икән район хакимиәттәренә борсоған мәсьәләләр буйынса бара.

- Ветерандарға матди ярҙам йөҙөнән нимәләр эшләйһегеҙ?
- Уларға аҡсалата ярҙам итә алмаһаҡ та, мөрәжәғәттәр иғтибарһыҙ ҡалмай. Беҙ ки­леп тыуған мәсьәләләрҙе төрлө юлдар менән хәл итергә тырышып, башҡа инстан­цияларға ебәрәбеҙ.
- Алдағы көндәргә ниндәй пландарығыҙ бар?

- Бөйөк Еңеүҙең 76 йыллығын матур итеп үткәреп ебәрергә, тип торабыҙ. Был көндө район үҙәгенең Еңеү паркында яуҙарҙа һә­ләк булған яҡташтарыбыҙ иҫтәлегенә ре­кон­струкцияланған һәй­кәл­де асыу­ҙа ҡатнашасаҡбыҙ.
Фәниә Сәлимгәрәева әңгәмәләште.
Читайте нас в