“Себештәр ҙур иғтибар талап итә”

Халыҡҡа файҙалы мәғлү­мәт­тәр биреү өсөн бройлер себештәре, уларға аҙыҡтар һа­тыу менән шөғөл­ләнеүсе Марсель Ваһапов менән һөйләштек. Уның кәңәштәренең, бәлки, кемгәлер файҙаһы ла тейер.
- Бройлерҙарға ҙур иғтибар һәм тәрбиә кәрәк. Таҙа тотоу, дөрөҫ туҡландырыу, вентиляция, тем­пература шарттары үтәлергә тейеш. Себеш­тәрҙе һатып алғас, тәүҙә өс көн буйына 38 градус йылылыҡтағы бинала тоторға кәрәк. Артабан температураны кәметергә мөм­кин. Әгәр ҙә ҡош балалары бергәләшеп өйөлөшөп торһалар, кәйефтәре насарланып китһә - тимәк өшөйҙәр, шуға тағы ла уларҙы аҫраған урынды йылы­тыбыраҡ ебәрергә кәрәк.
Мин тиҙ үҫә торған “Росс-308”, “Кобб-500” бройлер себештәрен һатыу менән шөғөлләнәм. “Росс-308” тоҡомлоларының аяҡтары оҙон түгел, әммә һөйәктәре киң, ите күп сыға. Ә “Кобб-500” тоҡом­лолары һары тәнле була. Брой­лер­ҙар 60-65 көндә һуйырға ла өлгөрә.

Был ҡош балаларын артыҡ ҙур урында тоторға түгел, ашарға-эсергә, бер аҙ ҡыймылдарға урын булһа, шул еткән. Сөнки улар иреклектә йө­рөһә, буйға ғына үҫеп, бик һи­мермәйәсәк.
Инфекцияға ҡаршы көрәшеү маҡсатынан ҡошсоҡтарға анти­биотиктар эсерелә. Мин себеш­тәрҙе һатҡанда ҡатнаш аҙыҡ, витаминдар менән бергә антибиотик та алырға тәҡдим итәм. Антибиотиктарҙан һуң ҡулланыла торған пробиотиктар, шулай уҡ витаминдар ҙа ошо махсус ҡатнаш аҙыҡтарҙың составына ингән. ПК-2, ПК-5 иң яҡшылары һанала. Улар­ҙың составында төрлө микро­эле­мент­тар, витамин­дар, үҫем­лек май­ҙары бар. Әгәр ҙә ҡатнаш аҙыҡ­тың бер төрөн алһаң, артабан да тик шуны ғына бирергә кәрәк. Сөнки ҡоштарҙың организ­мы ошоға ғына өйрәнә лә, баш­ҡаһын бирә башлаһаң, үҫеш туҡтап ҡала.

Себештәрҙең алдарында һәр ваҡыт аҙыҡ менән һыу торорға тейеш. Йәшел витамин булараҡ кесерткәнде ваҡлап ашатыу, йәки уның эҫе һыу менән бешекләнгән һыуын эсереү ҙә бик һәйбәт.
Ҡош үҫтергәндә бик иғтибар­лы булыу мөһим. Әгәр ҙә берәй­һенең ауырығанын күрһәгеҙ, уны тиҙ арала айырығыҙ. Ҡоштарҙың да сирҙәре күп төрлө була. Вете­ринар менән һөйләшеп, ауыры­уын асыҡларға, ниндәй дарыу эсерергә кәрәклеген белергә кәрәк. Йо­ғошло ауырыу булып, баш­ҡаларға йоғоп ҡуймаһын. Ошо ҡағиҙә­ләрҙе, кәңәштәрҙе то­топ, сифатлы ит менән туҡланығыҙ! - ти Марсель Марат улы.
Фәниә Сәлимгәрәева яҙып алды.
Реклама хоҡуғында.