Хәтер һөйләһен...

15 февраль - совет ғәскәр­ҙәрен Афғанстандан сығарыу көнө. Ошо уңайҙан үҙәк ки­тап­хана хеҙмәткәрҙәре Ауырғазы күп профилле колледжының Ҡырмыҫҡалы филиалы сту­дент­тары өсөн «Хәтер һөй­лә­һен...» тип исем­ләнгән фәһемле пат­риотик-тәрбиә сәғәте үткәрҙе. Сараға “Патриот” йәмәғәт ойошмаһы рәйесе, хәрби хәрәкәт вете­раны, яугир-интерна­цио­на­лист Айрат Йәр­мөхәмәтов саҡырылды.
Айрат Әлмей улы үҙенең тормош юлы, 1979-1989 йыл­дарҙа Афғанстан Респуб­лика­һында хеҙмәттә булған район­даш­тарыбыҙ, уларҙың яҙмышы тураһында һөйләне.
- Эйе, дошмандар менән осрашырға, бәрелештәрҙә ҡат­нашырға тура килде. Ул йылдарҙы күҙ алдына кил­терһәң, бигерәк тә һәләк булып ҡалған егеттәрҙе иҫкә тө­шөр­һәң, әле лә ҡыйын, күңелдә төҙәлмәҫлек яралар ҡалған. Ләкин иҫән ҡайтҡан яугир­ҙа­рыбыҙ менән ос­рашып, уларҙы иҫкә алабыҙ, бергә хеҙмәт иткән сит тарафтарҙағы дуҫта­ры­быҙҙы ла онотмайбыҙ, ара­ла­шып йә­шәй­беҙ, - тип һөй­ләне яугир-интерна­ционалист.
Уның фәһемле сығышы тәьҫирендә уҡыусылар бынан 32 йыл элек булып үткән ва­ҡиғалар солғанышында ҡалды. Тын да алмай вете­рандың һәр һүҙен йотлоғоп тыңланылар. Егет-ҡыҙҙар үҙҙәрен ҡыҙыҡ­һындырған һорауҙарын бирҙе, яуаптар алып ҡәнәғәтләнде. Осрашыу иҫтәлеккә фотоға төшөү менән тамамланды.
Йылдар уҙған һайын, ҡанлы ваҡиғалар йырағая, иҫтәлектәр тоноҡлана барһа ла, әле һаман да “Афғанстан” һүҙе ғәзиз улдары таш-ҡаялар араһында башын һалған бик күп ағай- апайҙарыбыҙҙың йәндәрен тетрәндерә, интер­националь бурыстарын үтәп ҡайтҡан ир-егеттәребеҙҙең яраларын ҡуҙ­ғата, йөрәктәрҙе телгеләп, иҫкә төшөрөп тора. Киләсәк йәш быуынға ундай мәхшәрҙе кү­рергә яҙ­маһын. Донъялар ты­ныс булһын.
Эльмира РАФИҠОВА, китапханасы.
Ҡырмыҫҡалы ауылы.