Хәүефһеҙ һәм уңайлы булһын өсөн тырышалар

Ул тотороҡло үҫеш юлынан бара һәм республиканың юл комплексын үҫтереүгә лайыҡлы өлөш индерә. Предприятие, юлдар төҙөү, ремонтлау һәм реконструкциялауҙа генераль подрядсы булараҡ, киң ҡоласлы эштәр алып бара.

Һуңғы йылдарҙы ғына барлаһаҡ та, уларҙың фиҙакәр хеҙмәте һө­ҙөмтәһендә республиканың социаль-иҡтисади үҫеше өсөн әһә­миәт­ле эштәр башҡарылған. Мәҫәлән, М-5 “Урал” автомобиль магистра­лендә Ташкисеү биҫтәһе биләмә­һендә Ҡариҙел йылғаһы аша күпер һәм 7,5 километр оҙонлоғонда баш ҡалаға инеү юлын төҙөгәндәр. Ҡа­риҙел районында Бөрө – Таштүбә – Һатҡы автомобиль юлында йылға аша күпер менән Ҡариҙел ауылын урап үтеү участкаһында юл күтәр­гәндәр. Шулай уҡ Салауат райо­нының Көҫәпәй ауылына юл һал­ғандар. Өфө – Инйәр – Белорет юлының район биләмәһе аша үткән участкаһында юл япмаһын яңыртҡандар.

Быйыл да хеҙмәт күрһәткестәре юғары. Ҡариҙел һәм Дыуан райондарында Бөрө – Таштүбә – Һатҡы юлын реконструкциялауҙы дауам итәләр. Өфө һәм Ишембай ҡалаларында тиҫтәнән ашыу урамды ремонтлағандар.
Предприятие коллективы үҙ эшмәкәрлеген республика даирә­һендә алып барған бер үк ваҡытта, тыуған районында юлдарҙы төҙөк­ләндереүгә лә ҙур көс һала. Әйтә­йек, быйыл Ҡырмыҫҡалы – Түбәнге Төкөн, Олокүл – Ҡабаҡ – Һыуыҡ­шишмә һәм Олокүл – Һаҡай юлдарын ремонтлағандар. Респуб­ликаның ҡайһы ғына төбәгендә булһа ла, уларҙың төҙөгәне заманса, яҡшы, сифатлы тип билдәләнә. Яңы юлдар халыҡҡа ҙур уңайлыҡтар тыуҙыра, көнкүреш кимәлен күтәрә.

Коллектив хеҙмәткәрҙәре юл­дарҙың хәүефһеҙ һәм юлсыларға уңайлы булыуы хаҡында ҙур хәстәрлек күрә. Предприятие ҡарамағында барлығы 535,8 километр төбәк, муниципаль-ара һәм урындағы әһәмиәттәге юлдар иҫәпләнә. Уларға өҫтәп, 400-ҙән ашыу һыу торбаһын, 11644 погон метр барьер ҡоролмаһын, 1600 дана самаһы юл билдәһен, 35 автопавильонды һәр саҡ ҡараулы һәм тәртиптә тоторға кәрәк. Ә бит бер генә юл билдәһенең тейешле урында булмауы ла хәүеф-хәтәргә килтереүе ихтимал.

Юл хеҙмәткәрҙәренән ҙур яуаплылыҡ һәм теүәллек талап ителә. Ғөмүмән, был өлкәлә тырыш, ауырлыҡҡа сыҙам, физик яҡтан сыныҡҡан кешеләр генә эшләй ала.

Коллективта оҙаҡ йылдар дауамында үҙ һөнәренә тоғролоҡ һаҡлаған маҡтаулы хеҙмәткәрҙәр күп. Мастер Радик Теләүлин Баш­ҡортостандың атҡаҙанған төҙөүсе­һе булып танылған, мастер Рәмил Абдрафиҡов, инженер-лаборант Ольга Йыһаншина, водитель Фирғәт Ҡотдосов республиканың Почет грамотаһы менән бүләклән­гән. Машинист Радик Ғәлин “Башҡортостан Республикаһының атҡаҙанған транспорт хеҙмәткәре” тигән маҡтаулы исемгә лайыҡ, Ғәлинур Искәндәров республика Хөкүмәтенең Рәхмәт хаты менән бүләкләнгән. Предприятиела тиҫтәләрсә йыл намыҫлы эшләгән энергетик Рөстәм Ураҙбахтин, кешеләр менән яҡшы мөғәмәлә иткән кадрҙар буйынса тәжрибәле белгес, профсоюз ойошмаһы рәйесе Фирҙәүсә Мостафина, етештереү-техник бүлеге начальнигы Хәбир Фәтҡуллин, келәт мөдире Әлфиә Мусина, мастер Таһир Яҡупов, битумсы Ғайсар Ҡолбахтин, электрик Рәүфәт Яҡупов, машинист Энгель Халиҡов, водителдәр Рәсим Фәхретдинов, Альберт Шәрәфетдинов, Рәмзи Мөхәмәтшин, Мөнир Ғәләүетдинов, Сергей Дмитриев, ағалы-ҡустылы Дамир менән Әмир Батталовтар, Рәзит Баҡыев йәш хеҙмәт­тәштәренә матур үрнәк күрһәтә.

Предприятиеға етәкселек итеүгә лә әҙерлекле кадрҙар тәғәйен­ләнгән. Иң мөһиме – улар коллектив һынауын үткән. Идаралыҡ начальнигы Илдар Яруллин хеҙмәт юлын мастер булып башлаған, бер нисә йыл баш инженер вазифаһын башҡарған. Ике йыл элек уға етәкселек итеүҙе йөкмәткәндәр. Юл комплексы хеҙмәтенең бөтә нескәлектәрен белгән, үҙенә һәм кешеләргә талапсан, эште заманса ойошторған етәксе менән эшләү ауыр хеҙмәтте лә еңеләйтә, ти хеҙмәттәштәре Илдар Хәлим улы хаҡында.

Баш инженер Илгиз Зәйнуллин да үҙенең ғүмерен юл хужалығы тармағына бағышлаған. Тәүҙә етештереү-техник бүлеге инженеры, унан һуң төҙөлөш буйынса мас­тер булып эшләгән. Техниканың төҙөклөгө һәм етештереүсәнле эшләүе, технологик процестарҙың теүәл үтәлеүе нәҡ Илгиз Әсхәт улының тырышлығы менән ғәмәлгә ашырыла.

Коллективтың үҙенә генә хас традициялары бар. Әйтәйек, йәмғиәт­тә онотолоп барған хеҙмәт династиялары, быуындар бәйлә­неше күренештәрен бында ҡәҙер­ләп һаҡлайҙар. Аталы-уллы Әмир һәм Айҙар Ардашировтар – водитель, Рәфил Хисамов – водитель, ә улы Альберт лаборант булып эшләй.

Һуңғы йылдарҙа коллектив һәләтле йәштәр иҫәбенә тулы­лан­ған. Инженер Илнара Сөләй­мә­нова, мастер Юнир Ҡорманғолов, иретеп йәбештереүсе Зөлфәр Исхаҡов, машинист Айҙар Абакачев, водителдәр Алексей Матвеев, Алексей Алексеев, Рушан Мырҙа­ҡаев, машинистар Александр Сметанин һәм Рәфит Миһранов эштә йәштәрсә сәмлелек күрһәтә.
Күп йыллыҡ хеҙмәт эшмәкәр­леген республика юл комплексын үҫтереүгә арнаған булдыҡлы коллектив үҙенең һөнәри байрамын күтәренке кәйеф менән ҡаршылай. Улар төҙөгән юлдар юлаусылар рәхмәт әйтеп үтерлек.

Ҡырмыҫҡалы районы.