- Умартасылыҡтан икебеҙ ҙә йыраҡ булһаҡ та, күңел түрендә барыбер хыял, уй бар ине. Ғөмүмән был шөғөлөбөҙ дүрт йыл элек бер умартанан башланды, - ти Айгөл ҡыҙы. – Тормош иптәшем менән күп уйландыҡ – ниндәйҙер күңелгә лә ятҡан, матди яҡтан да терәк булырлыҡ шөғөл табыу уйы тынғылыҡ бирмәне. Шунан икебеҙ ҙә умартасылыҡта туҡталдыҡ. Эшләп ҡарайыҡ әле, тинек. Быйыл рәсми рәүештә крәҫтиән-фермер хужалығы булараҡ теркәлдек.
Шуныһы яҡшы - Хәмитовтарҙың уйын тормошҡа ашырыуҙа дәүләт ярҙамы ла иш янына ҡуш була. Айгөл Кәшфулла ҡыҙы Халыҡ мәшғүллеге үҙәгендә иҫәптә тороусы булараҡ, субсидияға эйә була. Был ярҙам төрө эшҡыуарлыҡ менән шөғөлләнергә теләүсе эшһеҙҙәргә бирелә.