Өфө – Ырымбур юлында – ҡот осҡос авария

2 октябрҙә Ауырғазы районында өс машина ҡатнашлығында авария теркәлгән. Был турала үҙенең блогында республиканың баш дәүләт автоинспекторы Динар Ғилметдинов хәбәр итә.

Фотоларҙан күренеүенсә, Өфө - Ырымбур юлында ҡот осҡос авария теркәлгән. Цемент ташыған “Volvo”, йөк фургоны “ГАЗель” һәм “Datsun” ныҡ бәрелешкән. Һөҙөмтәлә еңел автомобиль тимер өйөмөнә әүерелгән, ә йөк машинаһы түңкәрелгән. ”ГАЗель” ауған техникаға барып бәрелгән, уның водителе иҫән-һау.

“Datsun” руле артындағы өлкән йәштәге ҡатын һәм йөк машинаһы водителе дауаханаға оҙатылған. Ваҡиға урынында эшләгән полиция, ЮХХДИ хеҙмәткәрҙәре авария сәбәбен асыҡлай.

Фото: NewsBash.