Башҡортостанда 25 миллион һум урлауҙа ғәйепләнгән ирле-ҡатынлы Хәйруллиндарға хөкөм ҡарары сығарылды

Элекке кассир Луиза биш йылға дөйөм режимлы колонияға оҙатылды. Уның ире Марат алты йылға дөйөм режимлы колонияға хөкөм ителде. Уға суд залында уҡ ҡулына бығау кейҙерҙеләр. Бынан тыш, ғаилә урланған 25 миллион һумды банкка кире ҡайтарырға тейеш.

Бынан алда «Башинформ» агентлығы хөкөмгә тәүгеләрҙән булып Мараттты килтереүҙәрен хәбәр иткәйне. Һуңынан Луизаны ла алып килделәр.

Суд залынан «Башинформ» агентлығы хәбәрсеһе хәбәр итеүенсә экс-кассир иренең һорауы буйынса аҡсаны бүлеп алып сыҡҡан (биш меңдән 100 мең һумға тиклем). Ире бөтәһен дә казинола отторған. Юғалыр алдынан Луиза 1,5 миллион һум урлаған, ул ысын купюралар урынына ялғанын һалған. Хәйруллиндарҙың балалары ата-әсәһе ҡылған енәйәт тураһында телевизорҙан белгән, тиелә эш материалдарында.

Марат һүҙҙәренсә, ул ҡатыны менән юғары инстанцияға ялыу бирергә йыйына. Шулай уҡ ул журналистарға судтан ҡулына бығау кейҙереп алып китерҙәр тип көтмәгәнен әйтте. Луиза, үҙ сиратында, Салауат ҡалаһы судының хөкөм ҡарарын ишеткәс, илап ебәрҙе.

Хәтерегеҙгә төшөрәбеҙ, дәүләт ғәйепләүсеһе 25 миллион һум урлаған өсөн элекке кассирҙы – алты йылға, ә уның ирен ете йылға төрмәгә ултыртыуҙы, шулай уҡ уларҙың бер йылға иркен сикләүен һорағайны.

https://www.bashinform.ru/news/1499796-v-bashkirii-vynesli-prigovor-suprugam-khayrullinym-obvinyaemym-v-khishchenii-25-mln-rubley/

Фото: Ксения Калинина