Бөтә яңылыҡтар
Башҡа яңылыҡтар
17 Сентябрь 2020, 15:39

Һөт кухняһында – тәбиғи ризыҡтар

Башҡортостан Башлығы Радий Хәбировтың республикала һөт кухнялары селтәрен киң йәйелдереү буйынса күрһәтмәһенә ярашлы, уҙған йылдың июль айынан республикала балалар өсөн һөт фабрика-кухняһы үҙ эшен башланы. Был башланғыс “Демография” милли проекты сиктәрендә тормошҡа ашырыла.

Уның маҡсаты - Башҡортостанда граждандарҙы сәләмәт йәшәү рәүешенә йәлеп итеү системаһын формалаштырыу, шул иҫәптән сәләмәт туҡланыу һәм зарарлы ғәҙәттәрҙән баш тартыу.
Һөт фабрикаһы сеймалды урындағы фермерҙарҙан һатып ала. Бер тәүлек эсендә уларҙан һөт ризыҡтары әҙерләнә. Артабан тапшырыу пункттарына илтеп ҡуйыла. Һөт кухняһы өс йәшкә тиклемге балалар тәрбиәләгән аҙ тәьмин ителгән ғаиләләрҙе сифатлы һөт ризыҡтары менән тәьмин итеүгә йүнәлтелгән.
Ҡырмыҫҡалы үҙәгендә лә һөт ризыҡ­тарын таратыу пункты эшләй.
- 1 ғинуарҙан ташламаға хоҡуғы булған, ғаиләләге һәр йән башына уртаса килем баланың йәшәү минимумы ки­мәленән түбәнерәк булған ғаиләләрҙәге балалар бушлай һөт аҙыҡ-түлектәре – һөт, эремсек һәм ҡатыҡ менән тәьмин ителә. Бөгөн районда 200-ҙән ашыу бала сифатлы һөт про­дукцияларын бушлай алыу мөмкинлегенә эйә. Был исемлек көн дә тулыланып тора. Улар менән килешеү төҙөгән саҡта баланың мәғлүмәттәре берҙәм базаға индерелә һәм уға үҙенсәлекле номер бирелә. Балалар өсөн бушлай һөт про­дукцияларын һәм ҡоро һөт ҡат­нашмаларын һәр аҙнаның шишәмбе һәм йома көндәрендә алырға мөмкин. Һөт ризыҡтарын Стәрлетамаҡтағы “Һөт кухня­һы”нан таратыу ваҡыты алдынан ғына алып киләләр, шуға күрә балалар яңы һауылған һәм эшкәртелгән һөт ризыҡтарын ҡул­ланасаҡ. Һөт ризыҡтары аҙ килемле ғаи­ләләрҙәге 3 йәшкә тиклемге балаларҙан тыш, йөклө һәм бала имеҙгән әсәләргә лә ҡаралған. Бының өсөн тейешле до­кументтар йыйып, таратыу пункттарына мөрәжәғәт итергә кәрәк - ти “Баш­фармация” предприятиеһының Ҡыр­мыҫҡалы ауылындағы 398-се һанлы дарыухана мөдире Әлиә Ҡотлоева.
Әйткәндәй, түләүһеҙ нигеҙҙә бушлай һөт кухняһы учреждениеһы продук­ция­ларын алыу өсөн түбәндәге документтар кәрәк:
- паспорт күсермәһе (балалар өсөн тыуыу тураһында таныҡлыҡ);
- йәшәү урыны буйынса теркәлеү тураһында белешмә;
- күп функциялы үҙәктән аҙ тәьмин ителгән ғаилә статусын раҫлаусы белешмә;
- балаларҙы махсуслаштырылған аҙыҡ-түлек менән тәьмин итеү өсөн участка табип-педиатрҙан белешмә;
(Дауамын гәзиттән уҡығыҙ).
Фирүзә РӘХМӘТУЛЛИНА.
Автор фотоһы.
Читайте нас в