Түбәнге Төкөн ауылында ла Бөйөк Ватан һуғышында ҡатнашҡандарҙың, яу яландарында ятып ҡалған ауылдаштарҙың иҫтәлеге мәңгеләштерелде - стела ҡуйылды. Стела асыу тантанаһында муниципаль район хакимиәте вәкилдәре, ошо ауылда тыуып үҫеп, төрлө ерҙәрҙә йәшәүсе ауылдаштар, күрше ауыл халҡы ҡатнашты.
Ауыл Советы башлығы Илгиз Бикҡужин сараға килеүселәрҙе сәләмләп, изге теләктәрен еткерҙе.
- Илебеҙ тыныслығы, киләсәк быуындың бәхетле тормошо өсөн йәндәрен аямай көрәшкән ауылдаштарыбыҙҙың исемдәрен мәңгеләштереү – беҙҙең иң мөһим бурысыбыҙҙың береһе. Был үткәндең киләсәк менән бәйләнеше хаҡында һөйләй. Бигерәк тә йәш быуын Ватаныбыҙҙың азатлығы һәм үҙаллылығы өсөн йәндәрен аямаған батырҙарҙы онотмаҫҡа тейеш,- тине Илгиз Вәкил улы.