Бөтә яңылыҡтар
Башҡа яңылыҡтар
3 Сентябрь 2020, 01:15

Эх һеҙ, егеттәр...

Уларға 20-нән 23 йәшкә тиклем генә булған. Өсөһө лә шул урында йән биргән...

Йәйҙең һуңғы көнөндә Ҡыйғыла булған ҡот осҡос авария өс егеттең ғүмерен өҙҙө. “Лада Приора” автомобиле район үҙәгендә ҙур тиҙлектә ағасҡа барып бәрелә. Машинаның эсендә 20-нән 23 йәшкә тиклемге егеттәр ултырған була. Уларҙың бөтәһе лә табиптар килеп еткәнсе урында һәләк була.
“КП-Уфа” баҫмаһы уларҙың кемлеген һәм аварияның нисек килеп сыҡҡанын асыҡлаған. Баҡһаң, уларҙың артынан полиция ҡыуған булған.
Артем Ш, Артем А. һәм Рөстәм Х. исемле егеттәр ул кистә Үрге Ҡыйғы ауылы буйлап автомобилдә йөрөп килергә булған. Был ваҡытта ауылда полиция наряды дежур иткән һәм был машинаны туҡтатырға ниәтләгән. Тик водитель инспекторҙың талабын үтәмәгән һәм бар көсөнә газға баҫҡан. Шаһиттар белдереүенсә, улар бик ҙур тиҙлектә патруль машинаһынан ҡасҡан. Һөҙөмтә үтә ҡурҡыныс – водитель автомобиленә идара итә алмай юлдан оса һәм ағасҡа барып бәрелә.
"Кисә машина магазин янында торҙо, водитель ҡулына һыра тотҡайны, аяғында ла баҫып тора алмай ине. Музыкалары бөтә үҙәккә яңғырап торҙо. Ҡыҙғанысҡа ҡаршы, ана ниндәй фажиғә булды. Улар башҡаларҙы үлтерә ала ине, рулгә иҫерек килеш ултырғас", – тигән ошо ауыл кешеһе.
Юл полицияһы мәғлүмәттәре буйынса, был фажиғәгә тиклем бер нисә сәғәт алда водитель юл хәрәкәте ҡағиҙәһен боҙған, уны ҡаршы һыҙатҡа сыҡҡан өсөн яуаплылыҡҡа тарттырғандар. “Әле водителдең ҡаны химия-токсикология тикшереүе үтә, ул иҫерек булғанмы, юҡмы икәнлеген күрһәтәсәк”, – тинеләр ЮХХДИ-ла.
Егеттәр йыш ҡына ауыл буйлап ҡыуырға яратһа ла, уларҙы шаян, изге күңелле, ярҙам ҡулы һуҙырға әҙер кешеләр тип хәтерҙә ҡалдырғандар.
"Йәштәр, ни өсөн һеҙ шулай теге донъяға ҡабаланаһығыҙ? Атай-әсәйҙәрегеҙ тураһында уйлаһағыҙ ни була? Беҙҙең ауыл өсөн был ҙур юғалтыу..." – ти урындағы халыҡ.
Республика етәкселеге юлдарҙа авариялар һәм уларҙа һәләк булғандар һанын кәметеү өсөн бик күпте эшләһә лә, иҫеректәргә закон юҡ. Улар үҙҙәрен генә түгел, башҡа бер ғәйепһеҙ кешеләрҙе хәүефкә тарттыра. Юлдағы иң мөһим ҡағиҙәне онотмайыҡ: эстең икән – рулгә ултырма!
Фото: "КП-Уфа"
Автор: Альфия Мингалиева
https://bash.rbsmi.ru/articles/kh-ef-e-lek/Eh-e--egett-r-437781/
Читайте нас в