Ләйсән Үтәшева Раевкала ялын нисек үткәрә?

Мәғлүм булыуынса, билдәле спортсы, художестволы гимнастика буйынса атҡаҙанған спорт мастеры, Рәсәй йыйылма командаһы составында донъя һәм ике тапҡыр Европа чемпионы, күп тапҡыр Донъя кубогын яулаусы, художестволы гимнастика буйынса халыҡ-ара спорт комментаторы, Рәсәй телеканалдарында (НТВ, НТВ+, Россия-2, ТНТ һ.б.) төрлө йүнәлештәге тапшырыуҙар алып барыусы Ләйсән Үтәшева әле тыуған ерендә – Әлшәй районының Раевка ҡасабаһына ял итергә һәм көс йыйырға ҡайтҡан.

Ул “Инстаграм” социаль селтәрендәге диуарында үҙенең ялы менән уртаҡлашып тора. Был юлы яңы видеояҙмаһында ул көслө ағастың йәшендән һуң да нисек үҫеп ултырыуына һоҡланып: “Йәшен һуҡҡандан һуң терелгән көслө ағас”, – ти. Был ағас өс йыл буйы ҡороп, яланғас ултырған, әммә һуңынан терелеп, үҫеүен дауам иткән.

Роликта Ләйсәндең олатаһы төшөрөлгән. Уға 85 йәш. Ошондай олпат йәштә булыуға ҡарамаҫтан, ул да ейәнсәренән һис тә ҡалышмай, бик теремек, хатта бейеп тә күрһәтә. Ләйсән дә олатаһы кеүек 85 йәштә шундай дәртле булып ҡалырға вәғәҙә итә.

Фото: скриншот.