Ҡотҡарыусыларға ҡаршылыҡ күрһәткән...

Баш ҡаланың эҙләү-ҡотҡарыу отряды хеҙмәткәрҙәренә ниндәй хәлдәр менән генә осрашырға тура килмәй! Был юлы улар Ҡариҙелде йөҙөп сығырға ниәтләгән 64 йәшлек иҫерек ирҙе батыуҙан ҡотҡарған.

Ҡаршы ярға йөҙгәндә ир йөк паромына бәрелә, йәрәхәтләнә. Әгәр резина кәмәлә йөҙгән ир уны күреп ҡалмаһа, ҡотҡарыусылар килеп сыҡмаһа, һыуҙағы фажиғәләр һаны йәнә берәүгә артыр ине.

Шуныһы ҡыҙыҡ та, ҡыҙғаныс та: ир ҡотҡарыусыларға ҡаршылыҡ күрһәтеп маташа, ғүмере өсөн түгел, ә муйынына бау менән эленгән шлепкалары өсөн нығыраҡ борсола. Нисек тә пенсионерҙы катерға һалып, тәүге ярҙамды күрһәтәләр һәм ярға сығарып ҡуялар. ”Ир ныҡ иҫерек ине, беҙ уның нимә әйтергә теләгәнен дә аңламаныҡ,” - ти Граждандарҙы яҡлау идаралығы ҡотҡарыусылары.

17 июлдән алып ҡотҡарыусылар 10 кешенең ғүмерен һаҡлауҙа ярҙам иткән. Йәй башынан улар баш ҡалала 98 кешене бәхетһеҙлеккә тарыуҙан йолоп алып ҡалған.

Фото:Граждандарҙы яҡлау идаралығы.