Даирә
+17 °С
Ямғыр
Бөтә яңылыҡтар
Башҡа яңылыҡтар
8 Июль 2020, 20:45

Ризат Рамаҙанов: "Фермаға эшкә барып ҡараным, бер ҙә рәхәт түгел"

Коронавирус арҡаһында тормоштары ҡырҡа үҙгәргән кешеләр араһында сәхнә йондоҙҙары ла бар. Концерт миҙгелен тамамлап өлгөрмәйенсә нисә ай инде өйҙә улар...

Рәсәйҙәге коронавирус менән бәйле ваҡиғалар көтөлмәгән һөҙөмтәләргә килтерҙе. Кемдер эшһеҙ ҡалды, кемдер, киреһенсә, отто… Тормоштары ҡырҡа үҙгәргән кешеләр араһында сәхнә йондоҙҙары ла бар. Концерт миҙгелен тамамлап өлгөрмәйенсә нисә ай инде өйҙә улар.
Зинира менән Ризат Рамаҙановтар дуэты был осорҙо нисек кисерә? Ниндәй яңылыҡтары бар?
– Изоляцияны тулыһынса ауылда атай-әсәйгә ярҙам итеп үткәрҙегеҙ, буғай…

– Эйе, Ҡазанда тороп ҡараныҡ та бер-ике көндән ҡайтып киттек. Ҡарайһы киноларҙы ҡарап бөтөрҙөк, эшһеҙ сыҙар әмәл ҡалмағас, ауылға йыйындыҡ. Өйҙә тик ултырыу беҙҙең эш түгел икән, бер-ике көн генә рәхәт булды. Сәхнә кешеләре бит инде гел юлда, тегендә-бында йөрөп өйрәнгән. Бер ай Башҡортостанда, бер ай Сабала торҙоҡ. Бөтә эштәрҙе эшләнек, ата-әсәй алдындағы бурыс үтәлде.

– Ҡазанға килгәс нисек һуң?

– Ҡазанға килгәс, бәлеш бешерергә өйрәндек, Зинира менән бергә бәлеш бешергән юҡ ине. Тулыһынса яңы программа әҙерләнек. Унға яҡын яңы йыр яҙҙырҙыҡ. Беҙҙең миҙгел ғинуарҙан майға тиклем Татарстанда булһа, сентябрҙән декабргә тиклем Башҡортостан һәм сит төбәктәрҙә булырға тейеш ине. Изоляцияла булыу сәбәпле, башҡасараҡ килеп сыҡты. Ләкин киләһе миҙгелгә костюмдар, образдар әҙер. Фотосессияға ла өлгөрҙөк.

– Ауыл кешеһеме һеҙ, әллә ҡала мөхите күңелгә яҡынмы?

– Иллегә иллелер. Ауылда үҫһәк тә, ҡала тормошона өйрәндек. Ауылда ла эшләп арыта, көн дә бер нимә: иртән тораһың, һыйыр аҫты йыйыштыраһың, быҙау арҡанлайһың, төшкө ашта тағы аҫтын йыйыштырып, бесән һалаһың. Кис менән дә шул уҡ хәл. Улар өйрәнгән инде, ләкин беҙҙең эш башҡаса булғанғамы, арыта. Шуға Ҡазанға ҡайтып киләбеҙ. Унда ла дүрт стена эсендә туйҙырып ебәрә, кире ауылға ҡайтабыҙ. Тора-бара нисек булыр, кеше ҡартая-ҡартая ергә яҡыная тиҙәр бит. Бәлки, берәй ер алып, өй һалып ҡуйырбыҙ.

– Бәйләнсек ир-атмы Ризат? Был ни эшләп былай, ниңә быны бешерҙең, тип үҙәккә үткәрмәйһеңме?

– Юҡ кеүек. Нимә бар, шуны ашарға тырышам. Ғаилә ҡорған мәлдә ундай саҡтар ҙа булды. Зинира ашты башҡа төрлөрәк бешерә ине, мин ғүмер буйы әсәй ашын ашап үҫкән егет бит инде… Үҙемә нисек кәрәк, нәмә яратам, яратмайым, шуны әйттем дә ыңғайланып китте.

– Айгизәне күберәк Зинира тәрбиәләйҙер инде?

– Зинира менән бергә сәхнәгә сыҡҡансы Айгизәне, ысынлап та, ул күберәк ҡарай ине. Ә хәҙер атай-әсәйгә лә эләгә, минең һеңлем Гөлсиренгә лә. Балаға барыбер әсәй кеше яҡын. Мин уны күберәк иркәләйем, Зинира иһә, «нишләп кейемдәрең былай», «нишләп носкиларың урынлаштырылмаған», «сәсең йыйылмаған» тип шелтәләргә мөмкин.

– Бер-берегеҙгә кем тип өндәшәһегеҙ?

– Бер-беребеҙгә Ризат, Зинира тип өндәшәбеҙ, сөсө телләнеп тормайбыҙ. Шулай ҙа Зинираның телефонында мин – Жанымка, ул минекендә Емешем тип тора.

– «Эх, йырсы булаһы ҡалмаған» тимәйһегеҙме?

– Юҡ. Киреһенсә, ә кем булыр инем, ҡайҙа барыр инем, тип уйлайым. Әсәй урынына фермаға эшкә барып ҡараным, бер ҙә рәхәт түгел. Иртәнге сәғәт етенән тороп, киске дүрткә тиклем тиҙәк йыйыштырып, ашарға һалып... Әле аҙаҡ күпме эш ҡушалар. Ә беҙҙең эштә барыбер һин ҡәҙерлерәк, абруйлыраҡ. Иҫәнлек булһа, төрлө ерҙә лә эшләй алырмын тип уйлайым.

Фото: Sahne.ru
Автор: Самат Ғәлин
Читайте нас: