Һағыҙаҡ саҡһа…

Рәсәйҙә һағыҙаҡтарҙың дүрт төрө йәшәй. Ағыуҙары бер төрлө тәьҫир итә, эҙемтәләре лә берҙәй. Уның сағыуынан һуң дауаха­наға эләккәндәр йыш табылып тора. Бөжәктең сағыуы менән киҫкен ауыртыу башлана, тире ҡыҙарып шешенә. Күптәрҙә был күңелһеҙ хәл ике-өс сәғәттән һуң шуның менән тамамлана. Әммә ҡайһы берәүҙәрҙә көслө аллергия реакцияһы башлана. Был бик хәүефле осраҡ. Билдә­ләре түбәндәгеләр. Шешенеү көслө һәм ул ҙурая бара, тәнгә сабыртмалар сыға һәм ҡышлау башлана. Кеше уҡшый, тын алыу ауырлаша, пульс тотороҡ­һоҙлана, баш әйләнеүе мөмкин. Хатта аңын юғалтыуы ихтимал.

Иң тәүҙә йәрәхәтте ҡарағыҙ – ҡаяуы ҡалғанмы-юҡмы. Бул­һа, тартып сығарығыҙ. Тик уны ҡулығыҙ менән һытып сыға­рыр­ға тырышмағыҙ, сөнки орга­низмға ағыуҙы күберәк инде­рәсәкһегеҙ. Йәрәхәт урынын водород перекисы йәки спирт ме­нән йоғошһоҙлан­ды­рығыҙ. Ағыу организм буйлап таралма­һын өсөн һағыҙаҡ саҡ­ҡан урынды стерилләнгән бинт менән бәйләргә кәрәк. Боҙ һал­һағыҙ, ауыртыу баҫылыр. Антигистамин ҡабул итегеҙ, күбе­рәк һыу эсегеҙ, шул рәүешле ағыу организмдан тиҙерәк сығып бөтөр.

Һағыҙаҡтың бит-муйын ти­рәһен сағыуы айырыуса хәүеф­ле. Шеш бик оҙаҡ бөтмәй. Ҡайҙа аҙыҡ-түлек – һағыҙаҡ та шунда. Сүп-сар контейнерҙары, магазин һәм туҡланыу урындарында улар күпләп оса. Баҡса һәм һа­райҙарҙа оялай. Ҡайҙа йөрөһәгеҙ ҙә, был ағыулы бөжәктәрҙән һаҡ­ланыу сараһын күрергә кәрәк.