Ҡотҡарыусылар ауырлы ҡатындың балдағын сискән

Шмидт ауылында йәшәгән 1995 йылғы йөклө ҡатындың бармаҡтары шешенеп, ике балдағын сисә алмай аҙаплана. Ҡотҡарыу хеҙмәтенә шылтыратҡас, оҙаҡламай БР Ғәҙәттән тыш хәлдәр буйынса дәүләт комитетының авария-ҡотҡарыу хеҙмәткәрҙәре килеп етә.

Ҡотҡарыусылар махсус ҡорамалдар ярҙамында бәләгә тарыған ҡатындың ике бармағынан биҙәүестәрҙе ысҡындырып ала. Улар йылы һауа торошо урынлашыу менән ошоноң ише мөрәжәғәттәрҙең артыуы хаҡында белдерә. Ә йөклө ҡатын-ҡыҙҙың тәне, бармаҡтары былай ҙа тиҙ шешенеүсән.

Ошо юҫыҡта белгестәрҙең кәңәштәрен белеп ҡуйыу зыян итмәҫ:

- тыныслыҡ һаҡлағыҙ;

- балдаҡты сисеп алыу өсөн киҫкен хәрәкәттәр яһамағыҙ;

- бармаҡҡа һабын, майлы крем йәки май һөртөп, биҙәүесте ипләп кенә алып ҡарағыҙ;

- шулай уҡ бармаҡҡа еп урап, уны балдаҡ аҫтына үткәреп, тартып ҡарарға мөмкин;

- әгәр бер ниндәй алым да ярҙам итмәһә, “112” телефон һандары буйынса ҡотҡарыу хеҙмәтенә мөрәжәғәт итегеҙ.

Фото: Олег Яровиков