Йәш кешеләр марафонда йүгерә алмаясаҡ, ә олораҡтарҙың тыны ҡыҫыласаҡ, был бигерәк тә баҫҡыстан күтәрелгәндә һиҙеләсәк. Әммә һүҙ барыһы хаҡында ла түгел: был коронавирустың ауыр формаһын үткәргәндәргә ҡағыла. Улар араһында шулай уҡ неврологик билдәләр ҙә күҙәтелә. Мәҫәлән, оло йәштәгеләрҙең аңы буталыуы, ориентирҙы юғалтыуы кеүек осраҡтар теркәлгән. Сирлеләр дауахананан сыҡҡас та хәлһеҙлек һаҡланыуын, баштың томанланып тороуын билдәләй. Биологтар әйтеүенсә, сирҙең ошондай эҙемтәләре ни тиклем оҙаҡ һаҡланырын әлегә әйтеп булмай.
Америка ғалимдары иһә, коронавирус менән сирләгән кешеләр бәғзе психоневрология сирҙәренә дусар булыуы ихтимал, тип белдерә.
Әле быға тиклем булған тикшеренеүҙәр күрһәтеүенсә, пандемиялар донъяға төрлө тайпылыштар килтерә: энцефалопатия, психоз, нервы-мускул дисфункцияһы һәм башҡалар.
COVID-19 стресс булдырған ҡеүәтле факторҙарҙың береһе булып тора. Кеше сирҙән, үлемдән, билдәһеҙлектән ҡурҡа. Тап ошо кисерештәр башҡа ауырыуҙарҙы ҡуҙғытыуы ихтимал. Тикшеренеүҙәр күрһәтеүенсә, XVIII һәм XIX быуаттарҙағы киҙеү (грипп) пандемияларынан һуң психоневрологик ауырыуҙарҙың артыуы, 1918 йылдағы “испанка” эпидемияһынан һуң летаргик энцефалиттың йышайыуы теркәлгән.
Унан тыш, атипик пневмония (SARS), сусҡа киҙеүе һәм Яҡын Көнсығыш респиратор синдромы (MERS) эпидемияларынан һуң нарколепсия, энцефалит, Гийен-Барре синдромы һәм башҡа нервы-мускул патологияларының артыуы теркәлгән.
COVID-19-ҙан һуң кешелектең психоневрологик сәләмәтлеге ниндәй булыр – әлегә билдәһеҙ. Уларҙың оҙаҡ йылдар дауамында үҙ-үҙен белгертә барыуы ихтимал.
Мәғлүм булыуынса, быйыл 11 мартта Бөтә донъя һаулыҡ һаҡлау ойошмаһы COVID-19 яңы коронавирус инфекцияһы таралыуын “пандемия” тип атаны. Донъяла сирләгәндәрҙең һаны өс миллиондан артты, йөҙәр меңдәрсә кеше вафат булды.