Яугирҙәр тураһында хәстәрлек күреп

Йөк составында – иҫәп буйынса ун бишенсе “УАЗ Патриот” автомобиле, ике мотоцикл, аҙыҡ-түлек һәм бөтә республиканан ҡулланыусылар йәмғиәттәре йыйған әйберҙәр.
Уртаҡ эшкә беҙҙең район халҡы ла үҙ өлөшөн индерҙе. Өфөлә конвойҙы оҙатыу тантанаһында “Башпотребсоюз” советы рәйесе Венер Ильясов, БР сауҙа һәм хеҙмәттәр министрының беренсе урынбаҫары Василий Таболин, шулай уҡ район ҡулланыусылар йәмғиәттәре етәкселәре ҡатнашты. Улар араһында район ҡулланыусылар йәмғиәте рәйесе Рәүис Хажиев та бар ине.
Яҡташтарыбыҙ ебәргән гуманитар йөк эсенә үҙебеҙҙә етештерелгән икмәк-ҡалас һәм кондитер изделиелары ингән. Рәүис Әбүзәр улы белдереүенсә, алғы һыҙыҡта бындай продукцияға ихтыяж айырыуса ҙур – яугирҙәр үҙҙәре тыуған яҡтарынан тәмле ризыҡ ебәреүҙе һорайҙар. Районда әҙерләнгән ҡамыр ризыҡтары һәм сохариҙар һалынған тартмалар ярҙамдың дөйөм партияһы менән бергә тапшырылды. Предприятие махсус хәрби операцияның беренсе көндәренән үк гуманитар ярҙам йыйыуҙа ҡатнаша. Яугирҙәр өсөн транспорт һатып алыуға даими аҡса күсерелә, аҙыҡ-түлек йыйылмалары әҙерләнә.
Һуңғы өс йылда ғына ла ҡырмыҫҡалыларҙың илебеҙҙе яҡлаусыларға ярҙамы өс миллион һумдан артыҡ тәшкил иткән. Ләкин улар алғы һыҙыҡтағыларға ярҙам менән генә сикләнмәй. Һәләк булған хәрбиҙәрҙең ғаиләләре тураһында хәстәрлек күреү ҙә күҙәтеү аҫтында тора. Уларға утын менән булышалар, кәрәкле көнкүреш ярҙамы күрһәтәләр, ә яугирҙәрҙең балаларына байрамға бүләктәр тапшыралар.
- Беҙ ярҙам итәбеҙ һәм ярҙам итәсәкбеҙ. Ватанды һаҡлау – изге эш, - тине Рәүис Хажиев.

Алынған гуманитар йөк 334-се полкка ебәрелде лә инде. Техниканы һәм аҙыҡ-түлекте алырға батальон командиры урынбаҫары, Башҡортостандың “Обвес” ҡушаматы менән килгән. Уның һүҙҙәренә ҡарағанда, пикаплы “УАЗ Патриот” ялан шарттарында хәрби бурыстарҙы үтәү өсөн тура килә – тулы приводлы, насар юлдарҙан еңел үтә торған машина. Ҡырмыҫҡалы район ҡулланыусылар йәмғиәте уртаҡ Еңеүҙе яҡынайтыуға көсөнән килгәнсә өлөш индереп, яҡлаусыларыбыҙға ярҙам итеүҙә ышаныслы звеноларҙың береһе булып ҡала.
Яна СМИРНОВА.