Еңеү менән килһен был яҙҙар!

Ойоштороусылар был сараға ентекле әҙерлән­гән, һәр нәмә алдан һәм ныҡлап уйланылған – иң тәүҙә илебеҙ тыныслығы өсөн һәләк булғандар иҫтәлегенә Еңеү паркында сәскәләр һалынды, уларҙың рухтарына арнап доға ҡылынды.

Иҫке Бәпес ауылы клубы фойеһында ла илһөй­әрлек рухы сағыла. Бында темаға ярашлы ки­таптар, матбуғат баҫмалары, хәрби ҡомартҡылар күргәҙмәләре урынлаштырылған. Махсус хәрби операцияға бағышланған мөйөштән дә кеше өҙөл­мәне.

Сараның хөрмәтле ҡунаҡтары – махсус хәр­би операцияла ҡатнашыусыларҙың ғаилә ағзала­ры һый менән тулы өҫтәл янына ултырыу менән күңелдең иң нескә ҡылдарын тирбәтерлек, йөрәк­тәрҙе тетрәндерерлек, күҙҙәрҙе йәшләндерерлек әҙәби-музыкаль композиция тәҡдим ителде. 8-се класс уҡыусыларының “Кейек ҡаҙ юлдары”, Гүзәл Ғәлиуллинаның “Улыма”, Илдар Хәсәновтың “Бер ҡайтмаһам, әсәй, бер ҡайтырмын” йырҙары һәм ауыл апайҙары башҡарыуындағы моңло йырҙар, Фирүзә Абдуллинаның үҙенең уҡыусыһы Андрей­ға арнап яҙған йөрәккә үтеп инерлек шиғыры, яуҙа ҡатнашҡан яҡташтар тураһында экранда күрһәтел­гән яҙмалар бер кешене лә битараф ҡалдырманы.

Тантанала ҡатнашыусы рәсми ҡунаҡтар – рай­он-ара мәшғүллек үҙәге начальнигы Шамил Ха­физов, “Ватанды һаҡлаусылар” фондының соци­аль координаторҙары Ғәлиә Бикбаева менән Роза Кириллова, Иҫке Бәпес ауылы Советы хакимиә­те башлығы Азамат Ғәйфуллин, психолог Регина Плаксицкая махсус хәрби операцияла ҡатнашыу­сыларға һәм уларҙың ғаиләләренә ярҙам саралары тураһында һөйләнеләр, һорауҙарға яуап бирҙеләр.

Еңеү менән килһен был яҙҙар, яҡындарыбыҙ имен-һау һәм тиҙерәк тыуған яҡтарына әйләнеп ҡайтһындар, тип типте был сарала ҡатнашыусы­ларҙың һәр береһенең йөрәге.

Рина НОҒОМАНОВА:

- Бындай сарала тәүге тапҡыр ҡатнаштым. Быға тиклем дә саҡыралар ине, тик барырға форсат тей­мәгәйне. Бөгөнгө көндә махсус хәрби операцияла иле­беҙ тыныслығын яҡлаған яугирҙәрҙең ғаиләләре өсөн ошондай саралар бик кәрәк, тип уйлайым. Бында мин үҙемә кәрәкле, файҙалы бик күп мәғлүмәткә эйә бул­дым. Үҙемде ҡыҙыҡһындырған һорауҙарым да бар ине. Район-ара мәшғүллек үҙәге начальнигы Шамил Ха­физовҡа шәхсән мөрәжәғәт иттем һәм үҙемдең бар­лыҡ һорауҙарыма тулы яуап алдым. Шулай уҡ башҡа белгестәр менән дә кәңәшләштем. Тыуған илдәре өсөн башын һалған батырҙарыбыҙҙы хәтергә алдыҡ, һәй­кәлгә сәскәләр һалдыҡ, уларҙың рухына доға ҡылдыҡ. Яҡташтар күңел түрҙәренә үтеп инерлек концерт программаһы күрһәттеләр, һыйлы табын да әҙерләгән­дәр. Шундай матур, файҙалы сара ойоштороусыларға оло рәхмәт әйткем килә. Тормош иптәшем һәм башҡа барлыҡ яугирҙәр тыуған төйәктәренә иҫән-имен, еңеү менән әйләнеп ҡайтыуҙарын түҙемһеҙләнеп көтәбеҙ.

Альбина ХОҘАЙҒОЛОВА: - Махсус хәрби операцияла ҡатнашыусыларҙың ғаилә ағзаларын, беҙҙең кеүек тол ҡалған ҡатындарҙы бер урынға туплап, хәлдәребеҙҙе белгәндәре, кәңәштәре һәм кәрәкле мөһим мәғлүмәттәре менән бүлешкәндәре өсөн ныҡ ҡыуандым. Был сарала илһөйәрлек рухы шул тиклем көслө сағылды. Һәр һорауыбыҙға яуап бирергә һәм ярҙам итергә әҙер торған район белгестәренә, беҙҙең өсөн шун­дай йәмле сара ойоштороусыларҙың барыһына ла сикһеҙ рәхмәтлемен. Ватанды һаҡлаусылар, Махсус хәрби опе­рацияла ҡатнашыусыларға һәм уларҙың ғаилә ағзалары­на ярҙам итеү йылында ғына түгел, киләсәктә лә Тыуған иле өсөн көрәшкән, һәләк булған батырҙарыбыҙҙы һәм уларҙың ғаилә ағзаларын онотмаҫтар, ярҙамдарынан ташламаҫтар, тигән өмөт менән йәшәйем. Иң мөһиме, илебеҙҙә тыныслыҡ һәм именлек булһын! Махсус хәрби операция тиҙерәк тамамланып, ут эсендә йөрөгән яу­гирҙәр өҙөлөп көткән ата-әсәләре, туғандары, балала­ры, һөйгән йәрҙәре янына иҫән-һау һәм тиҙерәк әйләнеп ҡайтһындар!

Розалия НАЗАРОВА.

Автор фотолары.