Беҙ бергә

Илебеҙҙә Махсус хәрби операцияла ҡатнашыусыларҙың һәм һәләк булған һалдаттарҙың ғаиләләренә ярҙам күрһә­теү дауам итә. 2025 йылдың Рәсәйҙә Ва­танды һаҡлаусылар, Башҡортостанда Махсус хәрби операцияла ҡатнашыу­сыларға һәм уларҙың ғаилә ағзаларына ярҙам йылы тип иғлан ителеүе бик тә урынлы.

Уға ярашлы, ошо көндәрҙә Биша­уыл-Уңғар ауылы мәҙәниәт йортонда (етәксеһе – Фәһимә Ғаяз ҡыҙы Абдра­фиҡова) мәктәп менән берлектә “Беҙ бергә” исемле кисә-концерт ойошто­ролдо. Сараны Һәүәләй ауыл биләмәһе хакимиәте башлығы Тимур Әхәт улы Ғәләүетдинов асты. Мәктәп уҡыусылары һәм ауыл халҡы таҡтаташ янында сәскә һалып, яу яланында ятып ҡалған егет­тәребеҙҙе бер минут тынлыҡ менән иҫкә алды. Артабан улар “Хәтер шәме” янды­рып, Бөйөк Ватан һуғышында, шулай уҡ Махсус хәрби операцияла ҡатнашыусыларға арналған фотолар күргәҙмәһе менән танышып, батыр яугирҙәребеҙҙе хәтергә төшөрҙө.

Ауылдаштарыбыҙ Әлфиә Хәйретди­нова һәм Сәлиха Солтангилдиналар са­рала ҡатнашыусыларға йөрәк түренән сыҡҡан аһ-зарҙы шиғыр юлдары аша ет­керҙе. Үҙҙәренең сығыштарында тиҙерәк һуғыш бөтөп, ерҙә тыныслыҡ урын­лашыуын, ир-егеттәребеҙҙең тыуған яҡтарына еңеү менән ҡайтыуын теләне. Концерттың шиғырҙар һәм һағышлы йырҙар менән үрелеп барыуы күңелдәрҙе тетрәндерҙе.

Тыныс тормошта тауыш-тынһыҙ ғына йәшәп ятҡан ябай яҡташтарыбыҙ ысынбарлыҡта шундай ҡыйыу, арыҫлан йөрәклеләр икән. Уларҙың тиңһеҙ ба­тырлығы һәммәбеҙҙә ғорурлыҡ тойғоһо уята. Ошондай саралар ойоштороу ба­лаларҙа илһөйәрлек тойғоһо тәрбиәләй, тик берҙәм һәм бергә булғанда ғына дош­манды еңеүгә ышаныс булыуы хаҡында иҫбат итә.

Рәмилә ИСХАҠОВА, Бишауыл-Уңғар урта мәктәбенең башҡорт теле һәм әҙәбиәте уҡытыусыһы.