Ғаиләлә бәхет, тыныслыҡ, үҙ-ара аңлашыу булһын өсөн ниндәй кәңәштәр бирер инегеҙ

Ғаиләлә бәхет, тыныслыҡ, үҙ-ара аңлашыу булһын өсөн ниндәй кәңәштәр бирер инегеҙ?

Зөлфиә ӘСФӘНДИЙӘРОВА, Үтәгән ауылы:

- Тормошта иң мөһим урынды ғаилә алып тора. Ғаиләлә татыулыҡ булһа, һәр эшкә лә күңел ята. Ә татыу булыр өсөн бер-береңде аңлай белергә, сабыр булырға, кәрәк саҡта юл ҡуйырға кәрәк. Ғаилә бәхете – ул бәрәкәтле имен тормош.

Миңниса БӘҘРЕТДИНОВА, Ҡолош ауылы:

- Ғаиләм минең өсөн һәр саҡ беренсе урында тора. Ул минең терәгем, йылытып тороусы усағым. Та­тыу йәшәү өсөн бер-береңде тыңлай һәм аңлай бе­лергә кәрәк. Берең ут булғанда, икенсең һыу булырға тейеш, тигән әйтем бар. Шуға ла берең ҡыҙғанда, икенсеңә шым булыу кәрәк икәнен үтәп йәшәйем. Та­тыу ғаиләлә генә балалар тәртипле, итәғәтле булып үҫәләр. Балалар ата-әсәне ихтирам итһә, ейән-ейән­сәрҙәр тыңлаһа, йүгереп килеп ҡосаҡлаһа, үҙе бәхет. Шулай уҡ туғандарымдың эргә-тирәмдә булыуына шатланам. Иртә мәрхүм булған һеңлемдең һәм ағай­ымдың ҡыҙҙары минең күрһәткән изгелектәремде аңлап, яҡын күреүҙәре күңелемә йылылыҡ бирә.

Ғәлинур СӘЛИХОВ, Үрге Төкөн ауылы:

- Ғаилә минең өсөн 43 йыл бергә то­роп, бынан ете йыл элек баҡыйлыҡҡа күскән ҡатынымды һағыныу ҙа, кире ҡайтара алмаған йылдарға үкенес тә һәм, әлбиттә, балаларымдың, ейән-ей­әнсәрҙәремдең шатлыҡтарын күреп, һөйөнөү ҙә... Беҙ ҡатыным менән бик матур йәшәнек. Бергә йәшәгән йылдар бик тиҙ үтеп китә икән, шуға күрә ир менән ҡатын бер-береһенең ҡәҙерҙәрен белеп, аңлашып-килешеп йәшәһендәр ине.

Зөлфиә ШӘМСЕТДИНОВА, Ҡарлыман ауылы:

- Ғаилә - ул рухи һәм матди таяныс. Ике кеше лә үҙен яу­аплы тотһа, ялҡын һүрелмәй. Эштә йә юлда арығандан һуң беҙ ғәзиз ғаиләбеҙ янына йылы йортобоҙға ҡайтабыҙ. Бында күңел тыныслығы табабыҙ, арыуҙарыбыҙ, күңел бошоуы һы­пырып алғандай юҡҡа сыға. Иң мөһиме, бер-береңде ишетер­гә, үҙеңдең һүҙеңде өҫкә ҡуймаҫҡа. Аңлашылмаусанлыҡ килеп сыҡһа, үпкәләшеп йөрөргә түгел, уртаға һалып аңлашырға кәрәк.

Махсус битте Фәниә СӘЛИМГӘРӘЕВА әҙерләне.