Күңеле тулы йыр-моң

 - Эльвина Вәсим ҡыҙы, музы­ка менән ҡасан мауыға башла­нығыҙ?

- 1-се класҡа уҡырға төшкәс тә ата-әсәйем мине музыка мәк­тәбенә бирҙеләр. Фортепиано класы буйынса уҡытыусы мине йырларға өйрәтте. Сәхнәгә сығып йырларға мин үтә лә оял­сан инем, унда сығырға кәрәк, ә мин ҡурҡып шаршау артын­да баҫып торам. Шул ваҡыт атайым: “Әгәр әле сыҡмаһаң, башҡаса музыка мәктәбенә йөрөмәйһең!” - тип ҡырт киҫте. Уның ошо һүҙҙәре миңә этәргес бирҙе. Барлыҡ ҡыйыулығым­ды йыйып сыҡтым һәм сығыш яһаным. Шунан алып сәхнәнән төшкәнем юҡ. Фортепиано кла­сы буйынса музыка мәктәбен тамамланым. Мәктәптә һәм район Мәҙәниәт һарайында үткәрелгән сараларҙа, конкур­старҙа ҡатнашып, призлы урын­дар яуланым. Бөтә Башҡорто­станды урап сыҡтым тиһәм дә була.

- Был һәләт Һеҙҙә ҡайҙан килә?

- Атайым Вәсим Нуретдин улы буш ваҡыты булыу менән ҡулына баян ала. Шуға, һәләт миңә атайымдан күскәндер, тип уйлайым. Минең сәхнәлә сығыш яһауыма ата-әсәйем, туғандарым һәм дуҫтарым бик шатланалар һәм теләгемде ху­плайҙар.

- Мәктәпте тамамлағас, ҡайҙа уҡырға керҙегеҙ?

- Мәктәптән һуң мин башҡа юлды һайланым – Башҡорт дәүләт педагогия университеты­на психология буйынса уҡырға индем. Уҡыған сағымда музы­каны ташламаным, студенттар төркөмөндә шөғөлләнеүемде дауам иттем. Беҙ төрлө фести­валдәрҙә, конкурстарҙа ҡатна­шып, заманса рус йырҙарын башҡарҙыҡ.

Һуңынан тормошҡа сыҡтым һәм күберәк ваҡытымды ғаиләмә бағышланым. Сәхнәлә сығыш яһарға саҡырһалар ҙа, бала­лар бәләкәй булғанлыҡтан, бер аҙ туҡтап торорға тура килде.

- Телевидениела тәүге тапҡыр ҡайһы йыр менән сыҡтың?

- 2013 йылда Риф Йөҙлөкба­ев миңә “Кәкүк һағышы” ти­гән йырын тәҡдим итте. Уның һүҙҙәрен үҙе, ә көйөн Фәрит Яҡшығолов яҙған. Был йыр менән беҙ, хатта, Башҡорто­стан юлдаш телевидениеһына “Дарман” тапшырыуына ба­рып сығыш яһаныҡ һәм алтын миҙалға лайыҡ булдыҡ. Шул ваҡытта миндә беҙҙең район­да йәшәүсе яҡташтарыбыҙҙың йырҙарын башҡарырға, район данын күтәрергә тигән теләк барлыҡҡа килде.

- Үҙегеҙ йыр яҙғанығыҙ бармы?

- Бар. 2022 йылда корона­вирус пандемияһынан һуң, беҙ барыбыҙ ҙа был һынауҙарҙы үтеп сыҡтыҡ. Яҙғы һауа, ҡояш нурҙарын һибә. Машинала ки­теп барғанда кинәт кенә илһам­ланып, уйыма “Һинең менән” йырының һүҙҙәре килде. Эшкә килеү менән уны яҙып та алдым. Шунан уны Татарстандағы бер аранжировщикка ебәрҙем. Ул тиҙ генә аранжировка эшләне һәм беҙ клип төшөрҙөк. Соци­аль селтәрҙә уны “Туған тел” телевизион каналында күреп ҡалғандар һәм әлегә тиклем йы­рым был каналда яңғырай.

- Һеҙҙең йырҙы тағы ниндәй каналда тыңларға мөмкин?

- Быйыл миңә Татарстандың ТМТВ каналынан шылтыратып, был клипты художество сове­тында ҡарауға ризалыҡ алдылар. Шунан минең клиптың “Му­зыкаль ҡаймаҡ” хит-парадына үтеүе тураһында хәбәр иттеләр.

- Был клипты нисек төшөрөүе­геҙ тураһында ла һөйләп үтһәгеҙ ине?

- Был клипҡа улар юғары баһа бирҙеләр, уларға уның сю­жеты, кульминацияһы оҡшаған һәм ул “йәнле” килеп сыҡты. Барыһы ла клипта ир менән ҡатын һәм балалары төшөүенә ышанды. Ысынында иһә, был ролде уйнарға минең танышым, ижади кеше Денис Ҡадаев ри­залыҡ бирҙе. Балаларға: “Беҙ хәҙер “Мега” сауҙа һәм ял үҙә­генә барып, һеҙҙең ата-әсәй­егеҙ булып уйнайбыҙ”, - тип аңлаттыҡ. Уларға самокаттар, һабын күбектәре алып бирҙек. Был магазиндар буйлап йөрө­гән ысын ғаилә кеүек килеп сыҡты, балалар камераны бар тип тә белмәне, рәхәтләнеп уй­нанылар. Видеооператор Дамир Мөхәмәтйәнов камера менән беҙҙең арттан йүгереп йөрөнө.

- Клип төшөргәндә ҡыҙыҡлы ваҡыттар булдымы?

- Эйе, булды. Беренсе көн­дө беҙ балалар менән “Мега”ла төштөк. Шунан Тауһеңергә ҡай­тып, велосипедта йөрөргә тей­еш инек, ләкин Денис ҡулын һындырҙы. Шулай итеп, уның ҡулы төҙәлгәнсе ике ай көтөргә тура килде. Август бөтөп килә, ә беҙгә йәй күренеше кәрәк ине. Шул ваҡытта беҙ велосипед­та түгел, ә Тауһеңер күлендәге пирста төшөрөргә булдыҡ. Де­корациялар менән миңә әхирә­тем Динара Сәғәҙиева бик ныҡ ярҙам итте.

Бер көндө эш буйынса “Вик­тория” лагерына барғанда, күл­дә кәмә күреп ҡалдым. Мин уны биреп тороуҙарын һораным. Кәмәне матур итеп биҙәнек. Шулай итеп, ҡыҫҡа ғына ваҡыт эсендә клип төшөрә алдыҡ. Үҙебеҙ менән сосискалар һәм маршмэллоу алған инек. Клип аҙағында беҙ уларҙы усаҡта ҡыҙҙырҙыҡ. Бик матур килеп сыҡты.

- Клиптың сюжетын кем уй­лап тапты?

- Уны беҙ тормош иптәшем Айҙар Филорит улы менән бергә уйланыҡ. Был йыр менән ТМТВ хит-парадында ҡатнаштыҡ. Етенсе аҙнала Рамазановтар ғаиләһе, Илһөйә Бәҙретдино­ва, Зәйнәп Фәхретдинова кеүек данлыҡлы артистар араһында беренсе урын яулауыбыҙ минең өсөн көтөлмәгән хәл булды. Ба­янсы Рөстәм Әсәҙуллиндың бе­ренсе урынға барып етә алмауы ғына аяныс.

Туғыҙынсы аҙна инде хит-па­рад бара һәм беҙ ун башҡарыусы араһында. Был минең өсөн үҙе ҙур еңеү.

Күптәр миңә шылтыратып, һинең өсөн ҡайҙа тауыш бире­ргә, тип һорайҙар. Мин ТМТВ- ға шылтыратып, тауыштарҙың телевидениела нисә кеше ҡа­рауынан иҫәпләнеүен һәм уға художество советы ла баһа би­реүен белдем.

- Бының өсөн һиңә аҡса түләнәме?

- Эйе, был һорау күптәрҙе ҡыҙыҡһындыра. Был проект­та ҡатнашыу минең өсөн үҙе бер ҡыуаныс, һәләтеңде асыу мөмкинлеге. Эшемде күңел би­реп башҡарам. Барыһы ла аҡса менән иҫәпләнмәй бит. Яңыраҡ ТМТВ каналынан шылтыратып, минең беренсе урынға сығыуым тураһында әйттеләр һәм яңы йыр менән Ҡазан ҡалаһына съемкаға килергә саҡырҙылар.

Минең танылған шағирә Гөлфиә Шакирова менән уртаҡ йырым бар, ләкин мин “Туған тел” каналына барырға ризалыҡ бирергә өлгөрҙөм. Форсаттан файҙаланып, район гәзите аша район халҡына мөрәжәғәт ит­кем килә: мәғәнәле шиғырҙары йәки яҙылған көйө булғандар “ВКонтакте” социаль селтәре аша минең менән бәйләнешкә инһендәр ине. Мин уларға бик рәхмәтле булыр инем.

- Эльвина Вәсим ҡыҙы, икенсе йырығыҙ нисек тыуҙы?

- Ул илһам килеүгә бәйле. Бе­ренсе йырым мине ҡанатланды­рып ебәрҙе. Икенсе йырым ми­нең мотлаҡ мөхәббәт тураһында булырға тейеш тигән ҡарарға килдем. Уның һүҙҙәре оҙаҡ яҙылды. Бер көндө һеңлем Диа­на йөрәк ҡушыуы буйынса мах­сус хәрби операция биләмәһенә командировкаға китергә йыйы­ныуы, яугирҙәргә стоматология ярҙамы күрһәтәсәге тураһын­да әйтте. Уның өсөн борсолоп, текст яҙыуҙы туҡтатып торҙом. Ул иҫән-имен йөрөп ҡайтҡас, күңелем тынысланды һәм уй­ыма иң мөһиме ер йөҙөндә ты­ныслыҡ һәм мөхәббәт йәшәһен тигән һүҙҙәр килә башланы. Мин йырҙың тексын яҙыуҙа ярҙам һорап танылған шағирә Гөлфиә Шакироваға мөрәжәғәт иттем. Хәҙер йыр махсус хәрби операция биләмәһенән ир-егет­тәрҙең иҫән-имен ҡайтыуҙарын теләгән доға булараҡ яңғырай.

Был йыр менән мин “Туған тел” телеканалында сығыш яһа­ным һәм тиҙҙән уны был канал­да күрһәтәсәктәр.

- Һөнәрегеҙҙе алмаштырып, ижади юл буйлап китеү тураһын­да уйлағанығыҙ булманымы?

- Ундай теләгем юҡ, сөнки ижад минең өсөн бер мауығыу ғына. Ижадтың төп эшем булы­уын теләмәйем. Ә эштән ҡай­тҡас, фортепиано артына ул­тырып, сәғәттәр буйына уйнай алам. Миңә бигерәк тә классик музыка оҡшай.

- Ғаиләгеҙ һәм эшегеҙ менән дә таныштырып үтһәгеҙ ине?

- Айҙар Филорит улы менән ғаилә ҡороуыбыҙға 16 йыл тул­ды. Ике ҡыҙыбыҙ үҫеп килә. Сафинаға – 14, Айлинаға 9 йәш. Өлкән ҡыҙым “Далан” бейеү ан­самбленә йөрөнө, әлеге ваҡытта художество мәктәбендә уҡый, рәсем төшөрөргә ярата. Бәләкәй ҡыҙым Айлина музыка мәктә­бендә фортепиано класында бик теләп шөғөлләнә, шулай уҡ театр түңәрәгенә йөрөй.

Мин муниципаль район ха­кимиәтендә торлаҡ программа­ларын тормошҡа ашырыу сек­торы мөдире булып эшләйем.

- Киләсәккә ниндәй планда­рығыҙ бар?

- Киләсәктә лә ижадымды ташламаҫҡа уйлайым, яҡташта­рым миңә йыр текстары һәм көйҙәрен тәҡдим итһәләр, мин уларҙы сәхнәлә ҙур теләк менән башҡарасаҡмын.

- Эльвина Вәсим ҡыҙы, ҡыҙыҡлы әңгәмәгеҙ өсөн рәхмәт. Киләсәктә лә һеҙгә ижади уңыштар юлдаш булһын, тыныс­лыҡ һәм изгелек теләге килә.

Гөлсәсәк ӘСӘҘУЛЛИНА әңгәмәләште.