Мөләйем ағинәй Үрге Төкөндә йәшәй

Мөләйем ағинәй Үрге Төкөндә йәшәй

Өлкән йәштәгеләр менән аралашыу – үҙе бер кинә­нес, ә уларҙың үткәне – үҙе бер тарих. Халҡыбыҙ юҡҡа ғына “Киләсәккә юл һалған­да, боронғоларға боролоп ҡарау яҡшы” тимәгән бит. Ололарҙың әйткән бер һүҙе һабаҡ, кәңәш-төңәше аҡыл булып яңғырай.

Һәр төйәк үҙенең сабыр холоҡло, инсафлы, иман һаҡ­сыһы һәм ауыл ҡото булған инәйҙәре менән дан тота. Үрге Төкөн ауылында йәшәүсе 85 йәшлек мөләйем ағинәй ҙә тап шундайҙарҙан.

Зәйнәб Көҫәпҡолова Ға­фури районы Үзбәк ауылын­да өс балалы ғаиләлә донъяға килә. Һуғыш һәм унан һуңғы йылдарҙың асы-сөсөһөн та­тып, ауырлыҡтарын күреп буй еткергән ҡыҙ туғыҙынсы класты тамамлау менән эшкә төшә.

- Тәүҙә башмаҡ ҡараным, һуңыраҡ сөгөлдөр баҫыуын­да эшләнем, аҙаҡ хаҡлы ялға сыҡҡансы һауынсы булдым, - ти ул был хаҡта.

Әйткәндәй, уларҙың ғаиләһендә барыһы ла эшһөйәр һәм уңған: апаһы Миңлегөл Санъ­ярова Өфөлә эшләп, Социа­листик Хеҙмәт Геройы тигән маҡтаулы исем ала.

19 йәшлек ҡыҙ һөйгәнен - Үрге Төкөн ауылынан Кәшәф Көҫәпҡоловты әрме хеҙмә­тенән көтөп алғас, йәштәр өй­ләнешергә ҡарар итә.

Көҫәпҡоловтарҙың ишле ғаиләһе алты балаға ғүмер, матур тәрбиә һәм белем би­реп, оло тормош юлына оҙата. Хәҙер ул-ҡыҙҙарының барыһы ла үҙ ғаиләләрен ҡорған, ба­лалар һәм ейән-ейәнсәрҙәр үҫтерәләр.

Зәйнәб инәй оло улы Ирек һәм килене Альбина менән 27 йыл гөрләшеп йәшәй. Нә­жибә ҡыҙҙары Илеш райо­нында донъя көтә. Юғары белем алған һәм уҡытыусы бу­лып эшләп хаҡлы ялға сыҡҡан Ләлә ҡыҙҙары Олокүлдә, Ил­дар улы Стәрлетамаҡ ҡалаһын­да, юғары белемле иҡтисадсы Әлфинә тормош юлдашының тыуған яҡтарында, Йылайыр районында төпләнә. Төпсөк ҡыҙҙары Әлфиәнең ғаиләһе иһә тыуған ауылын үҙ итә.

Ҡыҙғанысҡа, Кәшәф Бикбулат улы ғына ҡыҫҡа ғүмерле була һәм балалары­ның, ун бер ейән-ейәнсәре­нең, алты бүлә-бүләсәренең бәхетен дә татып өлгөрмәй­енсә, 61 йәшендә генә ауыр сирҙән донъя ҡуя.

- Аллаға шөкөр, 31 йыл ҡәйнәм Ғәйниямал Сафиул­ла ҡыҙы менән бергә татыу­лыҡта йәшәнек. Донъя көт­кән саҡта һәр саҡ уның ҙур ярҙамын тойҙом. Балаларҙы ла ҡарашты, йылы ойоҡбашта­рын да бәйләне, эштән арып ҡайтыуыңа ҡайнар сәй менән ҡаршы алды. Декретта ял итеп ятырға тура килмәне беҙгә. Бер айлыҡ балаларымды ҡал­дырып, сөгөлдөр эшенә сығып киттем. Алай ҙа ғына балала­рым илаҡ булманы. Ҡыҙға­нысҡа, ҡәйнәм йәшләйерәк, 76 йәшендә генә баҡыйлыҡҡа күсте. Балаларымдың атаһы ла бер эштән ҡурҡып торма­ны. Башҡа тракторсылар ял иткәндә, ул ял итә белмәне. Сөгөлдөр эше бөткәс, ферма­ла фураж тарттырҙы, тракторы менән бесән, һалам ташыны. Хаҡлы ялға сығып, бер йыл­дан ашыуыраҡ ҡына пенсия алып өлгөрҙө, ауыр сирҙән беҙҙе ташлап китеп барҙы, - тип ғүмер йомғағын һүтә иң бәхетле өләсәйҙәрҙең береһе.

Иң тыныс, иң һәйбәт һа­уынсыларҙың береһе ине, тип хәтерләй Зәйнәб Әҙелмөхәмәт ҡыҙын ауылдаштары. Һауын­сы булып эшләп, хаҡлы ялға сыҡҡас та, баҡсаға эшкә төшә ул. Унда һуған, һарымһаҡ, кә­беҫтә, ҡыяр үҫтерергә, шул арала сөгөлдөр баҫыуында ла эшләргә өлгөрә.

- Эй, балаҡайым, сабый булһам да, ауыр һуғыш йылда­рын бер аҙ хәтерләйем. Унан һуңғы йылдар ҙа еңелдән бул­маны. Атайым үлгәндә дүрт йәштә генә ҡалғанмын. Хәҙер­ге тормош Аллаға шөкөр. Ай һайын бер туҡтамай пенсияһы килеп тора. Магазинда йә­нең теләгән аҙыҡ-түлеге бар. Инәйем оҙон ғүмерле булды. Ҡартайғас, уны үҙебеҙгә алып ҡайтып ҡараным. 102 йәшен­дә үҙемдең ҡулымда мәрхүмә булды. Уның кеүек оҙағыраҡ йәшәге килә лә бит, ҡартай­тып китте. Ғүмер буйы бар эште ҡул менән башҡарҙыҡ. 20-25-ләгән һыйырҙы көнөнә өс тапҡыр ҡул менән һауыу, унан ҡала бөтмәҫ-төкәнмәҫ йорт эштәре сәләмәтлекте ҡаҡшатҡандыр, күрәһең, ике ауыр операция үткәрергә тура килде, - тип бер аҙ көрһөнөп тә ҡуя әңгәмәсем.

Эйе, өлкән быуын вәкил­дәре күпте күргән, күпте ки­сергән һәм һәр ваҡыт оло хөрмәткә эйә. Зәйнәб инәй­гә лә балалары, ейән-ейән­сәрҙәре, бүлә-бүләсәрҙәре хәстәрлегендә тағы ла оҙаҡ йылдар бәхетле ҡартлыҡ кисе­рергә насип булһын тигән изге теләктә ҡалабыҙ.