Бәхет хакимлыҡ итә

Бәхет хакимлыҡ итә

Һәр ауыл тырыш халҡы, өлгөлө ғаиләләре менән йәмле һәм ошондай кешеләре менән дан тота. Ҡабаҡ ауылынан Лида һәм Алик Ҡәүиевтар тормоштан, эштән йәм табып, бына 37 йыл инде бер-береһен ҡәҙерләп, шатлыҡтарҙы бергә кисереп ғүмер итәләр.

Ҡәүиевтарҙың ғаиләһендә бәхет хакимлыҡ итеүе, уңған булыуҙары, бер-береһен хөр­мәт итеп йәшәүҙәре күренеп тора. Улар үҙ көстәре менән ҙур йорт һалып, матур донъя булдырғандар, дүрт балаға ғүмер биргәндәр.

Был пар хеҙмәт юлын Өфө ҡалаһында башлап, артабан ауылда дауам итә. Баш ҡалала тыуып үҫкән Лида Венер ҡыҙы Өфө авиация техникумын та­мамлап, Өфө моторҙар эшләү берекмәһендә контролер-тех­нолог булып эшләй. Буласаҡ тормош иптәше Алик Мәрүән улы ла бында хеҙмәт иткән була – ул “Москвич” маши­наларының моторҙарын йыя. Мишкә районы егете мәк­тәптән һуң ошо заводҡа эшкә урынлаша. Армияла хеҙмәт итеп ҡайтҡас та, кире бында эшен дауам итә. Ул ҡыҙҙың ҡул аҫтында эшләгән була. Егеткә ҡыҙҙың сибәрлеге, ал­саҡлығы, үҙ эшенең оҫтаһы булыуы оҡшаһа, ҡыҙ егеттең уңғанлығын, ихласлығын үҙ итә. Йәштәр бер-береһен оҡ­шатып, дуҫлашып йөрөгән­дән һуң ғаилә ҡоралар. Лида бәләкәй саҡтан Ҡабаҡ ауылы­на өләсәһенә ҡунаҡҡа ҡай­тып йөрөй. Ауыл тормошо уға бәләкәйҙән таныш була. Шуға ла ауылда йәшәү уны һис тә ҡурҡытмай. Йәш пар ҡыҙҙың өләсәһенең ауылына ҡайтып, уның менән бер түбә аҫтында өс йыл татыу йәшәйҙәр. Аҙаҡ был ғаилә яңы урында өр- яңы мөһаббәт, зауыҡлы йорт һалып сығып, матур донъя ҡора. Уңған хужаларҙың йор­то балҡып тора, унда бөтә уңайлыҡтар һәм шарттар бул­дырылған. Был йорттоң эсен­дәге һәр нимә һоҡландырғыс. Улар әле лә тырышып донъя көтәләр, мул итеп баҡса үҫ­терәләр. Бергәләшеп тырыш­маһаң был тиклем хозурлыҡты тыуҙырып булмаҫ та ине. Шулай уҡ гүзәллекте булы­рыу өсөн күңел матурлығы ла мөһим. Ә был сифаттар Ҡәүи­евтарҙа урғылып тора!

Бында йәшәй башлағас, ғаилә башлығы кирбес заво­дына эшкә урынлаша, ә Лида ҡаҙанлыҡ операторы була. Ар­табан ир урындағы “Ағиҙел” колхозында иретеп йәбеште­реүсе, тимерсе булып эшләй, әле Ҡабаҡтағы тимер-бетон заводында хеҙмәт итә. Ә Лида “Вектор” торлаҡ-коммуналь хужалығында оператор була, яңыраҡ ҡына дүрт балалы әсә булараҡ хаҡлы ялға сыға.

Әлеге көндә Ҡабаҡта йәшәүсе улдары Айҙар вахта ысулы менән Яңы Уренгойҙа “Газпром”да эшләй. Ҡыҙҙары Алһыу ике юғары белемле - Өфө авиация университетын һәм Башҡорт ауыл хужалығы университетында белем ала. Ата-әсә кеүек ул да хеҙмәт юлын Өфө моторҙар төҙөү заводында башлай. Уларҙың икеһе лә үҙҙәре ғаиләле, ата-әсәне ейән-ейәнсәрҙәр менән һөйөндөрә.

Моряк булып хеҙмәт иткән Динар әлегә көндә – контрак­тсы, Владивостокта хеҙмәт итә. “Улыбыҙ Динар - хәрби хәрәкәттәр ветераны. Хәрби ҡаҙаныштары өсөн миҙалдары ла бар”, - тип ғорурлыҡ менән хәрби улдарын телгә алды ата- әсә.

Кеселәре Альберт Ишем­байҙа кадет корпусында уҡып йөрөй. Яҡшы уҡыуы һәм тәр­тибе өсөн билдәләнеп тора. Ишембайға киткәнсе райо­ныбыҙҙың Зәки Бикбаев етәк­селегендәге “Йондоҙ” хәр­би-патриотик клубына йөрөй. Улар тарафынан Бөйөк Ватан һуғышы йылдарында һәләк булған һигеҙ яугирҙең һөлдәһе табыла.

- Балаларыбыҙҙың уңышта­ры өсөн һөйөнөп ғүмер итәбеҙ. Улар йәшәүебеҙгә дәрт бирә. Ауыл ерендә йәшәгәс, мал аҫрамайынса булмай. Элек ике-өс һыйыр тотһаҡ, хәҙер берҙе генә ҡалдырҙыҡ. Шу­лай уҡ ҡош-ҡорт та үҫтерәбеҙ. Үҙең етештергән аҙыҡҡа етәме ни! Шулай үҙ көнөбөҙҙө үҙебеҙ күрәбеҙ. Ә Айҙарыбыҙ Себер тарафтарында йөрөһә лә, ат­тар ҙа аҫрай. Ул вахтала саҡта малҡайҙарҙы ҡарарға аталары ярҙам итә. Балалар, ейәндәр өсөн тырышабыҙ, уларҙы һөй­өндөрөп йәшәге килә, - ти ҡа­тын.

Уңған кеше һәр яҡтан уңған инде. Хужабикәнең бе­шергән аштары, ҡамыр ри­зыҡтары ла ашап туймаҫлыҡ. Беҙ барған көндө лә өҫтәлендә ниндәй генә ризыҡ юҡ ине: бәлеш, ҡаҙылыҡ, ҡойҡа, ба­уырһаҡ, ҡоймаҡ, ҡаймаҡ-ҡо­рот, ҡайнатмалар... Быларҙың барыһын да үҙ ҡулдары менән әҙерләгән ул.

Бәхетле татыу ғаиләнең сере – берҙәмлектә, бер-бе­реңде хөрмәт итеүҙә һәм эшһөйәр булыуҙа. Һоҡланы­рлыҡ итеп йәшәгән Ҡәүи­евтарға ҡарайһың да өлгөлө ғаиләнең ошолай булыуына инанаһың.

Фәниә СӘЛИМГӘРӘЕВА.

Автор фотоһы.