Киләсәк – уҡытыусылар ҡулында

Мәктәптә уҡыусылар төплө белем ала, туған телдә иркен ара­ла­ша, рус һәм инглиз телдәрен белеү ки­ләсәккә ҙур мөмкинлек­тәр асы­уын аңлап, ныҡлап өйрә­нергә ты­ры­­шалар. Бында төрлө саралар, ҡы­­­­ҙыҡ­­лы конкурстар, фәһемле осра­­­­шыуҙар даими уҙғарылып тора.
Ни тиһәң дә, киләсәк талант­лы уҡытыусылар ҡулында. Ма­лай мәктәбендә лә тормошҡа юл табырға булышлыҡ иткән педа­го­г­­­­тар эшләүе менән бала­лар бәхет­ле. Һүҙем – ирле-ҡа­тын­лы Миләү­шә һәм Ғайса Ғәй­фуллиндар тураһында.
Ғәйфуллиндарҙың икеһе лә үҙҙә­рен иң ҡатмарлы, иң яуаплы һөнәрҙәрҙең береһенә бағышл­ағандарына яҙмыштарына рәх­мәт­ле. Улар заманса алымдар табып, билдәләнгән йүнәлештәр буйынса маҡсатлы эш алып баралар.
Миләүшә Радик ҡыҙы Бөр­йән­­­­дән килен булып төшкән. Тор­мош иптәше менән улар Стәрле­тамаҡ лицей-интер­на­тында таны­ша­лар. Улар бер клас­та уҡыйҙар. Ҡыҙ - педагогия инс­ти­­ту­тына, егет төҙөлөш технику­мына уҡырға инә, армияла була. Бер-береһен бала саҡ­тан белгән йәштәр яйлап дуҫла­шып китә­ләр. 1996 йылда мәңге­лек­­кә бер­гә булырға тип ике йәш йө­рәк ғаи­лә ҡора. Ҡулдарына дип­лом­­дар алған белгестәр егеттең ауы­­лына ҡайтып төпләнеп, төп йортта йәшәй башлай­ҙар. Улар өс балаға ғүмер бирә. Ғайса Йо­соп улы тәүҙә ауылда бригадир була, шунан БДПУ-ның география факультетына сит­тән тороп уҡыр­ға инеп, мәк­тәптә географиянан һәм физ­культуранан уҡыта баш­лай. Бе­лем алыу бер ваҡытта ла һуң түгел тип, Башҡорт дәүләт аграр уни­­вер­ситетын һәм Президент ҡар­шы­һындағы академияны ла та­мам­лай. Артабан директор вази­фа­һы ышанып тапшырыла.Бер нисә йыл­дан һуң йәш етәксенең ойош­то­роу һәләтен күреп, Ҡа­мыш­лы ауыл Советы хакимиә­тендә баш­лыҡ вазифаһы тәҡдим ителгәс, Ми­ләү­шә Радик ҡыҙы мәктәпкә етәкселек итә башлай. Байтаҡ йыл­дарҙан һуң ир мәк­тәпкә кире ки­лә һәм әлеге көнгә тиклем директор булып эшләй.
Башҡорт теле һәм тарих уҡы­тыу­сыһы Миләүшә Радик ҡыҙы һөнәри оҫталығын үҫтереү өсөн һәр саҡ эҙләнеүҙәр һәм ка­мил­лашыу юлында. Ул дәрестә­рендә яңы алымдарҙы индереп, уҡыусы­ларҙа белемгә ҡыҙыҡһы­ныу­ҙарын арттыра, фекерләүҙә­рен үҫтерә. Мәктәптән тыш сара­л­ар­ҙы ойош­то­роуҙа ла ең һыҙға­нып эшләй. Ул әҙерләгән мәктәп уҡыусылары төрлө конкурстарҙа ҡатнашып, юғары һөҙөмтәләргә ирешә. “Ха­зи­на” фольклор ан­сам­бле менән улар күрше ауыл­дар­ға ла баралар. Ә инде Ок­тябрь­ский ҡалаһында еңеү яулап ҡайталар. “Башҡортостан ынйы­лары” конкурсында ра­йон­да бер нисә йыл рәттән 1-се­ урынды алып, республика кимәлендә лә призлы урындар алыуға өлгә­шәләр.
Белем усағы уҙған уҡыу йы­лын­­да иһә Бөтә донъя башҡорт­тары Ҡоролтайы һәм “Аҡ тир­мә” ойошмаһы ойошторған “Урал батыр” мәктәбе проекты­на рес­пуб­лика гимназияла­ры менән бер рәттән ҡушылып, тәрбиә эшендә матур ғына һө­ҙөм­тә­ләргә ирешә, ҡиммәтле бүләк һәм Рәхмәт хаты менән бүләкләнә.
Эшенә бик яуаплы ҡараған, киң эрудициялы, талантлы, ижади ҡарашлы, эшһөйәр педагог Ми­ләү­­шә Радик ҡыҙы үҙе лә бер нисә йыл рәттән “Башҡорт теле һәм әҙәбиәте йыл уҡытыусыһы” бәй­ге­һендә ҡатнашып, үҙ көсөн һынап ҡарай. Ә 2019 йылда район­да Гран-при яулай, артабан рес­публикала ул “Туған телде һаҡлау” номи­нацияһы буйынса еңеүгә өлгәшә.
Ғәйфуллиндар “Йәш ғаилә” рес­пуб­лика конкурсында ла ҡат­нашып, 3-сө урынға лайыҡ була. Был ғаилә республикалағы теле­тап­шырыуҙа ла үҙ көстәрен һынап ҡарауҙы кәрәкле таба. “Алтын тирмә” телеуйын-викторинала ғаи­лә­нең бөтә ағзалары төрлө һорау­ҙарға яуап биреп, яҡшы һөҙөмтәгә ирешә.
Ғайса Йосоп улы эшендә бул­дыҡ­лы, ойоштороу һәләтле оҫта етәксе булһа, ғаиләһендә - уңған ир, хәстәр­лекле атай. Төп йорт нигеҙендә күркәм йорт һалып, ғаиләһенә бар уңайлыҡтар бул­дыра. Атаһы ла улар менән бергә ҡәҙер-хөрмәттә йәшәй (быйыл мәрхүм булып ҡалды). Йорт хужа­һы аттар аҫрау менән дә ҡыҙыҡ­һына. “25 йәшемә атайым “Ҡарлу­ғас” ҡушаматлы ҡолон бүләк ит­кәй­не. Шулай яйлап ҡолон­лай-ҡолонлай артты, һатып та алдыҡ”, - тине ул. Малдарға бесән әҙерләү өсөн трактор, агрегаттар ҙа бул­ды­ра. Уларҙы “электр көтөүсеһе” көтә. Ауыл аттары ла бергә йөрөйҙәр икән.
Ғәйфуллиндарҙың ғаиләһенә һоҡ­ланмаған кеше юҡтыр. “Оя­һын­да ни күрһә, осҡанында шул булыр” тигән халыҡ мәҡәле бар. Улар балаларына төрлө ерҙәр күр­һәтеп, тормоштарын фәһемле лә, иҫтәлекле лә итеп ойоштора белә­ләр. Тырыш, талантлы парҙың балалары ла егәрле һәм һәләт­ле­ләр. Азалия М.Аҡмулла исе­мендәге Башҡорт дәүләт педагогия универси­тетының тарих факульте­тын тамамла­ған, әле үҙе тормошта. Айтуған - Өфө­нөң Йылға кол­леджы студенты булһа, Ильяс 7-се класҡа бара. Әйткәндәй, Айтуған гармунда һәм тынлы музыка ҡо­рал­дарында уйнай, Ильяс гитарала уйнай һәм йырлай ҙа. Шулай уҡ бала йәнле Ғәйфуллиндарға ике баланы тәрбиәгә алырға тура килә: хәҙер инде Луиза БГПУ кол­леджын тамамлап, кейәүгә сығып, үҙ аллы тормошҡа аяҡ баҫһа, Илнар 6-сы класҡа барасаҡ. Ғөмү­мән, Ғәйфуллиндар балалары­ның, шул иҫәптә уҡыусыларының ысын шәхес итеп формалашыуы өсөн бар көстәрен һала. Улар йәш быуынға белем биреп кенә ҡалмай, тормошта үҙ юлдарын табырға ла ярҙам итә. Ғәй­фул­линдарҙың тор­мошон бер нисек тә йорт һәм мәк­тәпкә генә айырып булмай. “Мәк­тәп­тән, уҡыусыларҙан башҡа йә­шәү­ҙе күҙ алдына ла килтер­мәйбеҙ. Мәктәп беҙҙең өсөн икенсе йортобоҙ, ул бала кеүек, уны хәс­тәр­ләргә, ҡарап, тәрбиәләп торор­ға кәрәк. Киләсәктә лә балаларҙың шат тауыш­тарынан белем усағыбыҙ яңғырап тор­һон ине”, - ти Миләүшә Ғәйфуллина.
Фәниә Сәлимгәрәева.