Даирә
+8 °С
Болотло
Бөтә яңылыҡтар

Кешелекле һәм туған йәнле

Бөгөнгө һүҙем изге күңелле туғандарымдың береһе, Прибельский ауылында йәшәүсе апайым, атайымдың бер туған һеңлеһе Мәүсилә Лотфуллина тураһында.

Ул 1936 йылда бар тәбиғәт ҡышҡы йоҡонан уянған, һәр нимәнән яҙ һулышы килгән мәлдә, Ҡустығол ауылында, Мәүлиха һәм Заһиҙулла Рәхи­мовтар ғаиләһендә, икенсе бала булып донъяға килгән. Ғүмере гел шатлыҡ-ҡыуаныста, һау­лыҡ-байлыҡта үтһен, донъя­ның бар ҡаршылыҡтарын еңеп, гел алға ғына атлаһын тип, яңы тыуған сабыйҙы, яратып, Мәүсилә тип атағандар.
Ҡыҙ тыуған ауылында 4 класты тамамлап, Һарт-Науруз ауылы мәктәбенә уҡырға бара. Унда 7-се класты уҡып бөткәндән һуң, Прибельский мәктәбендә 9-сы класты тамамлауы тураһында өлгөргәнлек аттестаты ала.
Артабан уҡырға теләге бик ҙур булһа ла, яҙмыш үҙенекен итә. 19 йәшендә генә үҙенең буласаҡ тормош иптәше Зәйелде осрата һәм уға кейәүгә сыға. Ҡарлыман һөт-консерва заводында эшләй башлай. Бер-бер артлы бала­лары тыуа. Ул тормошҡа сыҡҡанда ҡәйнә­һенең әсәһе лә иҫән була. Мәүсилә ике ҡәйнә менән һүҙгә килешмәй, татыу йәшәп, уларҙы тәрбиә­ләп-хөрмәтләп һуңғы юлға оҙата.
Тормош уның ҡаршыһына ниндәй генә һы­нау­ҙар, ҡар­шылыҡтар ҡуймай, ҡайһы тараф­тарға ғына алып барып ташламай: Ҡырғыҙстанда, Саха-Яҡут Республикаһында, Яр Саллы ҡала­һында ла йәшәйҙәр һәм эшләйҙәр. Беҙҙең Мәүсилә апайҙың са­быр­лығына, түҙемлегенә хай­ран ҡалырлыҡ. Ны­ҡыш­ма­лылыҡ, үҙ-үҙенә һәм башҡа­ларға ҡарата та­лапсанлыҡ – апа­йымдың холҡона хас һыҙаттар.
Ләкин, түҙемлектең дә бер сиге булалыр инде. 1977 йылда ул өс балаһын алып, бар донъяһын иренә ҡалдырып, Үзбәкстанға сығып китергә мәжбүр була. Тормош иптәше вафат булғандан һуң ул ҡабат­тан Прибельскиға күсеп ҡайта.
Хаҡлы ялға сыҡҡансы Ҡар­лыман-һөт консерва заводын­да, һуңынан Ҡарлыман шәкәр заводы лабораторияһында эш­ләй. Эш дәүерендә ул бик күп Маҡтау ҡағыҙҙары, ҡим­мәтле бүләктәр менән бүләкләнә. Ауылдаштары араһында абруйы ҙур булған Мәүсилә Заһиҙулла ҡыҙы ун йыл рәттән халыҡ заседателе лә була.
Әлеге көндә Мәүсилә апай Прибельский ауылында улының ғаиләһендә йәшәй. Өс ейәнсәре, ике ейәне һәм өс бүләсәре уны шат­лыҡ­тары менән ҡыуандырып тора. Ике ейәнсәре Прибельский мәк­тәбендә уҡытыусы булып эшләй.
Мәүсилә апайҙың йәш сағы­нан уҡ тауышы бик матур, моңло итеп йырлай һәм гармунда уйнай. Хаҡлы ялға сыҡҡандан һуң ул үҙ аллы ҡөрьән сүрәләрен ятлай. Бө­гөнгө көндә уны Прибельскиҙа, Ҡустығолда Ҡөрьән аштарына оҫтабикә булараҡ саҡыралар. Бәләкәйҙән шулай беше, ныҡ булып үҫкәнгәме, ниндәй генә эшкә тотонһа ла, урын-еренә еткереп башҡарыуы, кешелек­лелеге, изгелеге, туған йәнле булыуы, һәр кемде ҡурсалап йәшәүе менән айырылып тора.
Беҙ барыбыҙ ҙа хөрмәтле апайыбыҙҙы ярата­быҙ, хөрмәт итәбеҙ. Ул һәр ваҡыт килгән кеше­ләрҙе йылмайып, асыҡ йөҙ менән ҡаршы ала, үҙенең кәңәштәрен биреп, теләктәрен әйтеп оҙатып ҡала. Киләсәктә лә уға беҙҙе һөйөндөрөп оҙаҡ йылдар йәшәүен теләйбеҙ.
Флүрә Самиҡова.
Олокүл ауылы.
Читайте нас: