“Сәләм” тапшырыуында – беҙҙең район

Уҙған йома иртәһенең “Сәләм” программаһы данлыҡлы шәхестәргә, төрлө өлкәләрҙә ҙур ҡаҙаныштарға бай булған районыбыҙға бағышланды. Муниципаль район хакимиәтенең эштәргә идара итеүсеһе Фәрғәт Ҡотлобаев, “Юбилейный” кинотеатры директоры Зәлил Исхаҡов, Иҫке Муса ауыл хакимиәте башлығы Илмира Ғәлиәхмәтова, Ибраһим музейы директоры Ғәзимйән Ибраһимовтар студия ҡунаҡтары булды.Уларҙан районыбыҙҙың арҙаҡлы шәхестәре, спорт ҡаҙаныштары, билдәле династиялар тураһында һөйләүҙәрен һоранылар. Фәрғәт Фәрит улы, районыбыҙҙан сыҡҡан башҡорт мәғрифәтсеһе Мөхәмәтсәлим Өмөтбаев, шағирҙарыбыҙ Шәриф Бикҡол, Фәрит Иҫәнғолов, Ирек Кинйәбулатов, Дилә Булгакова, Рәмил Сурағол, яҙыусылар Фәнил Әсәнов, Роберт Байымов, яҙыусы-академик Ғайса Хөсәйенов, яҙыусы, профессор, филология фәндәре докторы Тимерғәле Килмөхәмәтовтар тураһында ғорурланып һөйләне. Ул шулай уҡ яҡын киләсәктә районда башҡарыласаҡ уй-пландар менән дә уртаҡлашты.