Күпер аша хәрәкәт сикләнә

Өфөлә “Хәүефһеҙ һәм сифатлы автомобиль юлдары” милли проектына ярашлы 2019 йылда башланған эш - Воровский урамы тәңгәленән Ағиҙел аша күпер төҙөлөшө - дауам итә. Әле барыһы ла график буйынса бара, ете капиталь таяу урынлаштырылған, башҡарылған хеҙмәт күләме - 90 процент.

Гипростроймост институты белгестәре кәңәшенә ярашлы, терәткес плитәләрҙе монтажлау эштәре башлана. Ошо сәбәпле 22 августа 15.00-16.30. сәғәттәрҙә 1956 йылда төҙөлгән иҫке күпер аша хәрәкәт ваҡытлыса туҡтатыла.

Бынан тыш, 23 августа 01.00 - 02.30 сәғәттәрҙә 1993 йылда төҙөлгән күперҙең ике һыҙаты буйынса “Өфө - Аэропорт” йүнәлешендә лә автомобиль хәрәкәттәре сикләнәсәк.

Өфө халҡынан, килгән ҡунаҡтарҙан ремонт эштәре менән бәйле ваҡытлыса уңайһыҙлыҡтарҙы аңлап ҡабул итеү һәм тиҙлек режимын, аралыҡты күҙәтеү, юл билдәләренә иғтибарлыраҡ булыу һорала.

Фото: Өфө хакимиәте сайты.