Күркәм сифаттары менән ихтирам яулай

- Ғәлиә Наил ҡыҙы, беҙ һеҙҙе шундай наҙлы һәм нәзәкәтле, шул уҡ ваҡытта көслө рухлы ҡатын-ҡыҙ булараҡ беләбеҙ. Бындай күркәм сифаттарҙы күңелегеҙгә кем һалды?

- Ишле ғаиләбеҙҙең иң олоһомон. Ата-әсәйебеҙ беҙҙе һөйөү һәм наҙға төрөн­дөрөп кенә тәрбиәләнеләр. Үзбәкстанда тыуып, 25 йәшемә тиклем шунда йәшә­нем. Тыуған илебеҙгә ихтирам һәм Ва­тан алдында бурыслы булыу тойғоһонда тәрбиәләнгән Совет осоро балаһы мин. Яҙмыш ҡушыуы буйынса Үзбәкстанда ты­уһам да, минең тамырҙарым Башҡорто­стандан, Рәсәйҙән. Шуға күрә 2000 йылда тормош иптәшем һәм дүрт йәшлек улыбыҙ менән өләсәй-олатайҙарыбыҙҙың тыуған төйәктәренә йәшәргә ҡайттыҡ. 2014 йылда Олокүл ауылынан йорт һатып алып, шун­да төпләндек. Улыбыҙға һәм ҡыҙыбыҙға ла үҙебеҙҙеке кеүек илһөйәрлек тәрбиәһе би­реп үҫтерҙек.

- Һеҙ ниндәй ҡатын-ҡыҙ?

- Ғаиләмде һәм туғандарымды өҙөлөп яратыусы йомшаҡ күңелле, алсаҡ, ярҙам­сыл ҡатын-ҡыҙмын. Яҡындарымды үҙ ҡул­дарым менән әҙерләгән төрлө-төрлө тәмле ризыҡтар менән һыйларға яратам.

- Ҡатын-ҡыҙ бәхете нимәлә?

- Үҙ-үҙемә йыш ҡына “Нимә ул ҡа­тын-ҡыҙ бәхете?” тигән һорауҙы бирәм. Әлбиттә, күптәр өсөн бәхет ул – йәшәүгә илһам һәм ҡеүәт биреүсе күңел торошо. Әммә уның тағы бер мөһим өлөшө бар – дөйөм ҡабул ителгән ҡанундарға, ижти­мағи нигеҙҙәргә ҡарамайынса, үҙең булып ҡала белеү. Бының өсөн, һис шикһеҙ, ҡыйыулыҡ талап ителә. Ә был ҡыйыулыҡ ҡай­ҙан килә һуң? Үҙ-үҙеңде сағылдырыуҙан һәм шулай уҡ тойғоларың, тирә-яҡ донъя, йәшәү шатлығын тойоу менән бәйләнеш­тә булыу теләгенән. Яҡындарыңа ярҙам итеү, битараф булмау, һәр саҡ кәрәкле һәм мөхәббәтле булыу ҙа ҙур бәхет ул.

- Нисек итеп ирекмән, координатор бу­лып киттегеҙ?

- Һөнәрем буйынса иҡтисадсы булһам да, күңел торошом менән ижади ҡарашлы кешемен. Тирә-яҡтағы кешеләргә һәр саҡ ярҙам итергә ашығам. Хәҙерге заман­да күп кенә ҡатын-ҡыҙҙарҙа лидерлыҡ сифаттары бар, әммә уларҙың күптәре үҙҙәрен танытырға ҡурҡа һәм һайлау мөмкинлегенән үҙҙәрен-үҙҙәре мәхрүм итәләр. Мин дә көнкүреш мәшәҡәттәре һәм балалар тәрбиәләү менән шөғөл­ләнгән ябай ғына әсәй, йорт хужабикәһе инем. Әммә 2022 йылдың февраль айы күптәребеҙҙең аңдарын үҙгәртте... Шул саҡтарҙа тәүҙә төрлө хистәр кисерҙем һәм үҙемде ҡулға алғас, хәлдең үтә етди­легенә төшөндөм. Ошо ваҡыттан алып, үҙебеҙҙең яугирҙәргә ярҙам итергә кәрәк тигән ҙур теләк тыныслыҡ бирмәне һәм мине ирекмәнлек эшенә алып килде. Рухи яҡтан да һәм улдарыбыҙға, ирҙәре­беҙгә, туғандарыбыҙға ярҙам итеү телә­ге менән яныу яғынан да берҙәм булған ҡатын-ҡыҙҙар менән берлектә “Беҙҙең патриот” ирекмән хәрәкәтенә нигеҙ һал­дыҡ. Ваҡыт үтеү менән күрше ауылдар, район-ҡалалар халҡы беҙгә ҡушылды.

Илебеҙ Президенты Владимир Путин махсус хәрби операцияла ҡатнашыусы­ларға ярҙам итеү маҡсатында “Ватанды һаҡлаусылар” Дәүләт фондын булдырыу указына ҡул ҡуйғас, Башҡортостанда ла был фондтың филиалы асылды. Уны БР Дәүләт Йыйылышы – Ҡоролтай депута­ты Гөлнур Ҡолһарина етәкләне. Махсус хәрби операцияла ҡатнашыусыларға һәм уларҙың ғаиләләренә ярҙам күрһәтеү – беҙҙең фондтың төп маҡсаты, тип бил­дәләй Гөлнур Ғәлинур ҡыҙы.

Тап бөгөнгө көн ваҡиғалары Ты­уған илебеҙ һағында торған хәрбиҙәргә ярҙам итеүсе ҡатын-ҡыҙҙарҙың роле ни тиклем ҙур икәнлеген күрһәтте. Мин дә әсә, Рәсәй Армияһы офицеры әсәһе һәм минең бурысым – тылдың ярҙамы еңеү килтерергә ғәйәт ҙур булышлыҡ итеүен үҙ миҫалдарында раҫлаусы ата-бабала­рыбыҙ өлгөһөнә эйәреү.

- Әсә, ҡатын-ҡыҙ булараҡ бөгөнгө хәл­дәр ниндәй хистәр уята?

- Хәүеф тойғолары кисерергә, күп уй­ланырға тура килә, әммә беҙ – әсәйҙәр һәм ҡатын-ҡыҙҙар һәр саҡ ныҡ булырға тейешбеҙ. Беҙ – ғаилә усағын һаҡла­усылар, беҙҙең бурыс – көтөргә һәм ярҙам итергә! Беҙ – улдар, Геройҙар тәр­биәләүселәр! 2023 йылдың ноябренән алып төп эшем – “Ватанды һаҡлаусы­лар” Дәүләт фонды менән бәйле. Бында төрлө ваҡиғалар уртаһында ҡайнарға, күп мәсьәләләрҙе хәл итергә, ярҙам ҡулы һуҙырға тура килә. Шуға күрә мин ныҡ булырға, хистәргә үтә бирелмәҫкә ты­рышам. Бөйөк Ватан һуғышында ҡа­тын-ҡыҙҙар тылда ғына түгел, фронтта ла ҙур ярҙам күрһәткәндәр. Мәҫәлән, минең өләсәйем Розия Чембарисова 19 йәшендә генә Бүздәк районы хәрби ко­миссариатынан мобилизация буйынса фронтҡа алынған, аэростатсы булған. Сталинградты һәм Совет Заполярьеһын обороналауҙа ҡатнашҡан, бик күп миҙалдарға эйә булған. Шулай булғас, беҙгә һис ҡасан бирешергә ярамай. Беҙ, ҡатын-ҡыҙҙар – төп тыл! Кем нисек бул­дыра ала, шулай ярҙам итеү – беҙҙең төп бурыс!

- Фәһемле әңгәмәгеҙ өсөн ҙур рәхмәт, Ғәлиә Наил ҡыҙы! Изге эшегеҙҙә тик уңыштар ғына юлдаш булһын!

Розалия НАЗАРОВА әңгәмәләште.