«Әсә һөйөүе менән донъя йәмле»

Икенсе ҡатта урынлашҡан Ҡырмыҫҡалы ауылының “Илһам” түңәрәге ағзалары төшөргән матур-матур һүрәттәр, махсус хәрби операцияла яҡындарын юғалтҡан ғаилә ағзаларының портреттары һәр кемдең иғтибарын йәлеп итмәйенсә ҡалманы. Һәүәҫкәр рәссамдарҙың төрлө жанрҙағы һүрәттәре үҙенсә һоҡландырһа, беҙҙең тыныс киләсәгебеҙ өсөн баштарын һалҡан яугирҙәрҙең яҡындарының фотопортреттары уйсанландырҙы һәм күңелде болоҡһотто. Улар батырҙарыбыҙҙы бер ҡасан да онотмаҫҡа, уларҙың хәтерен һаҡларға кәрәклекте иҫкә төшөрҙө.
Ошонда уҡ ирекмәндәрҙең яугирҙәр өсөн әҙерләгән окоп шәмдәре, маскировка селтәрҙәре, ҡаҡ, бауырһаҡ һәм башҡа әйберҙәрҙән торған күргәҙмәһе менән танышырға мөмкин ине.
Тамаша залына һәр ингән кешегә Балалар сәнғәт мәктәбе тәрбиәләнеүселәре һәм район үҙәкләштерелгән китапхана хеҙмәткәрҙәре ҡулдан эшләгән аҡ сәскә бүләк ителде.
Сараның тантаналы өлөшөндә гүзәл заттарҙы байрам менән район хакимиәте башлығы Әлфир Фәрхәт улы Сабиров ҡотланы. Үҙ сығышында ул райондың бар ҡатын-ҡыҙҙарына ныҡлы һаулыҡ, тыныс һәм аяҙ күк йөҙө, бәхет һәм именлек теләп:
- Беҙҙең тормошта әсәләр иңдәренә бик ҙур бурыстар төшә, улар уларҙы еңеп сығалар. Әсәләр бала тәрбиәләүҙән тыш, йәмәғәтселек тәртибен һаҡлайҙар, дауалайҙар, белем бирәләр, етәкселек итәләр, һаталар, тегәләр, бәйләйҙәр, ирекмәндәр булалар.
Ә күптәре сабыр ғына ирҙәренең, улдарының һуғыштан әйләнеп ҡайтҡанын көтә. Беҙ улар алдында баш эйәбеҙ һәм махсус хәрби операцияның тиҙерәк тамамланып, яугирҙәрҙең иҫән-имен әйләнеп ҡайтыуҙарын теләйбеҙ, - тине Әлфир Фәрхәт улы.
Тантаналы сара сиктәрендә бер генә түгел, ә ике һәм унан да күберәк ғаилә ағзалары махсус хәрби операция зонаһында булған ҡатын-ҡыҙҙар, балалары федераль кимәлдә төрлө өлкәләр буйынса уңыштарға өлгәшкән бер төркөм әсәйҙәр һәм ирекмәндәр Рәхмәт хаттары һәм гөлләмәләр менән бүләкләнде.
Концертта әсәйҙәрҙе данлаған йырҙар яңғырауы, балалар баҡсаһы тәрбиәләнеүселәренең сығыштары, “Далан” һәм “Йондоҙ” ансамблдәренең дәртле бейеүҙәр башҡарыуы ла тантанаға килеүселәргә матур байрам бүләге булды.
Гөлсәсәк Бикҡужина.
Автор фотолары.