Берҙәмлектә көс

Берҙәмлектә көс

Халыҡтар берҙәмлеге көнө тамырҙары менән 1612 йылғы данлы ваҡиғаларға барып тоташа.

 Был байрам 1612 йылда Минин менән Пожарский халыҡ ополчениеһының Мәскәүҙе сит ил баҫҡынсыларынан азат итеү, бойондороҡһоҙ Рәсәй дәүләтселеген тергеҙеү символы булып тора.

Илебеҙ тарихының яңы осоронда бар­лыҡҡа килгән байрамда Рәсәй халыҡтары­ның берҙәмлеге, ҡаһарманлығы, дәһшәтле ҡурҡыныс килеп тыуғанда бер бөтөн булып туплана алыуы сағыла. Дүрт быуаттан ашыу элек булған ваҡиға Рәсәйҙең бөтә халыҡта­рын да берләштерә. Уның асылы Рәсәйҙең ысын көсө милләттәр төрлөлөгөндә һәм берҙәмлегендә икәнен күрһәтә.

Башҡортостан яугирҙәренең дә азат­лыҡ хәрәкәтендә ҡатнашыуы тарихтың сағыу бер бите булып тора. Рус дәүләтенә ҡушылғандан алып ир-азаматтарыбыҙ Рәсәйҙе яҡлап барлыҡ һуғыштарҙа ла яу саба.

Республикабыҙҙа бөгөн 160-тан ашыу милләт вәкиле йәшәй. Уларҙың һәр бе­реһенең күркәм йолалары, ҡабатланмаҫ мәҙәни үҙенсәлектәре бар. Уларға милли ҡомартҡыларын, үҙ телен һаҡлау һәм үҫте­реү мөмкинлеге тыуҙырылған. Быларҙың барыһы ла – татыулыҡ һәм халыҡтар араһындағы дуҫлыҡ миҫалдары.

Ил тарихының сағыу биттәрен мәң­геләштереү маҡсатында барлыҡҡа килгән байрам 2005 йылдан Рәсәйҙә Халыҡтар берҙәмлеге көнө тип билдәләнә. Был бай­рам иһә беҙҙең гражданлыҡ тойғолары­быҙҙы нығыта, барыбыҙҙы ла берләштерә. Тыуған ергә һөйөү, берҙәмлеккә ынтылыш, дуҫлыҡтың ҡәҙерен белеү, һынауҙарға әҙер тороу беҙҙе тағы ла көсәйтә, йәмғиәт һәм дәүләт үҫешенең яңы кимәленә күтәрелеү­гә булышлыҡ итә.

Фәнил ГӘРӘЕВ.